Ўзбекистонда 2020 йилнинг 10 ойи якунларига кўра ижтимоий-иқтисодий ривожланишнинг бир қатор асосий кўрсаткичлари яхшиланишда давом этди, деб ёзмоқда Spot Марказий банк хабарига таяниб.
Йиллик саноат ишлаб чиқариш ҳажмининг пасайиши 1,6 фоизни ташкил этди (январь—сентябрь ойларидаги пасайиш 2,7 фоиз бўлган), чакана савдо айланмасининг ижобий ўсиш кўрсаткичлари 1,2 фоиз даражасигача тикланди. Хизмат кўрсатиш ва қурилиш соҳаларида бажарилган ишлар ҳажми ўсиши мос равишда 2,2 фоиз ва 9,1 фоиз даражасида бўлди.
«Таҳлилларга кўра, қисқа муддатли даврда иқтисодий ўсиш ўз потенциал даражасидан паст бўлиши кутилмоқда. Бу талаб ҳамда таклифнинг босқичма-босқич тикланиб бориши, шунингдек, айрим иқтисодиёт тармоқларининг тўлиқ тикланиши учун узоқроқ муддат талаб этилиши билан изоҳланади», — деб қайд этилган хабарда.
Иқтисодий фаолликнинг оператив кўрсаткичлари босқичма-босқич тикланиш тенденциясини намоён этмоқда. Банк тўлов тизими орқали амалга оширилган транзакцияларнинг умумий сони октябрь ойида ўтган ойга нисбатан 7,3 фоизга, ноябрь ойида эса 1,1 фоизга ошди.
Ноябрь ойида савдо ва пуллик хизматлар соҳасида банк кассаларига пул тушумлари ҳажми 14,3 триллион сўмни ташкил этган бўлиб, бу октябрдаги кўрсаткичдан 1,4 фоизга кам, 2019 йилнинг мос даврига нисбатан солиштирганда эса 11,8 фоизга кўп.
Дастлабки ҳисоб-китобларга кўра, 2020 йил якуни бўйича ЯИМнинг реал ўсиши 1—1,5 фоиз атрофида бўлиши кутилмоқда.
Аввалроқ Марказий банк карантиндан кейин Ўзбекистон иқтисодиётининг тикланишига қанча вақт кетиши мумкинлигини маълум қилганди.
Изоҳ (0)