Ўзбекистонда бир оила учун бир ойлик суюлтирилган газ лимити 20 килограмм деб белгиланган, аммо амалда 11,7 килограмм газ тўғри келмоқда, дея хабар бермоқда «Kun.uz».
Суюлтирилган газнинг эҳтиёжга нисбатан кам ишлаб чиқарилиши уни етказиб беришда кўплаб муаммоларни келтириб чиқармоқда. Бу ҳақда Сенат кенгашининг аҳоли ва тадбиркорлик субъектларини электр энергияси, табиий ва суюлтирилган газ ҳамда кўмир билан таъминлаш ҳолатини ўрганишга бағишланган йиғилишида сўз борган.
Маълум қилинишича, бир оила учун бир ойга мўлжалланган газ лимити 20 килограммни ташкил қилиши белгилаб қўйилган, аммо амалда оила бошига 11,7 килограмм газ тўғри келмоқда.
«Суюлтирилган газни ўз вақтида етказиб бериш билан боғлиқ муаммолар талайгина. Наманган, Фарғона, Андижон, Қашқадарё, Самарқанд вилоятларида суюлтирилган газни етказиб бериш 50—60, айрим ҳолатларда 90 кунгача чўзилиши аниқланди.
Шунингдек, суюлтирилган газни белгиланган миқдордан анча кам бериш ҳолатлари ҳам мавжуд. Газ баллонининг музлаб қолган қисмини тозаламасдан тўлдириш оқибатида 20 килограмм эмас, 10 килограмм газ етиб боряпти. 10 килограмм газни қандай қилиб 45 кунга етказиш мумкин?
Хонадонда истиқомат қилувчилар сонига эътибор қилмай, 2 киши учун ҳам 1 та, 10 киши учун ҳам 1 та газ баллони бериш ҳолатлари бор.
Бундай муаммолар аҳолини хусусий тармоқлардан 2—3 баравар қиммат нархда ёки ‘Ҳудудгазтаъминот’ омборларидан яширин равишда белгиланган нархдан қимматроққа сотиб олишга мажбур қиляпти.
Мавзуга доир: «Босим пасайди эмас, олти кун умуман газ бўлмади». Бухорода аҳоли айнан нима сабабдан йўлларни тўсди?
Билдирилишича, 2020 йилда аҳолининг суюлтирилган газга бўлган эҳтиёжи 837,8 минг тоннани ташкил қилади. Бироқ амалдаги эҳтиёжга нисбатан 278,9 минг тонна кам газ етказилиши кутилмоқда. Бундай ҳолатлар 2018—2019 йилларда ҳам кузатилган.
Йиғилишда табиий газга бўлган эҳтиёжни прогнозлаштиришдаги камчиликлар оқибатида истеъмол ва таъминот ўртасидаги номувофиқликлар хусусида ҳам сўз борди.
«Табиий газни етказиб бериш ҳажмлари йил сайин ошиб бораётган бўлса-да, аҳолининг мавжуд эҳтиёжлари қопланмаслиги, прогнозга нисбатан истеъмолнинг юқори бўлиши кузатилмоқда.
2020 йилда иқтисодиёт тармоқларига етказиб берилиши кутилаётган табиий газ ҳажми 2019 йилга нисбатан 102,5 фоизга, аҳолига етказиб бериш ҳажми эса 2019 йилга нисбатан 113,1 фоизга ўсиши кўрсатилган. Аммо шунга қарамай, эҳтиёж қопланмаяпти.
Вилоят ҳокимликлари томонидан қилинган прогнозларнинг реал эҳтиёжларга мос келмаслиги табиий газ билан таъминлай олмасликка олиб келяпти», — деди Қутбиддин Бурҳонов.
Шунингдек, кўмир ва суюлтирилган газ таъминотидаги талон-торожликлар ҳақида ҳам маълумот бериб ўтилди.Бош прокуратура вакили Беҳзод Исмоиловнинг маълумот беришича, куз—қиш мавсумига тайёргарлик кўриш бўйича масъул идораларнинг 1200 нафардан ортиқ мансабдор шахсларига огоҳлантириш берилган бўлса-да, бу масалада қонунийлик тўлиқ таъминланмаяпти.
«Кўмирнинг қора бозорга чиқиб кетиши ўрганилганда, 80 дан ортиқ ҳолатда салкам минг тонна кўмир маҳсулотларининг ноқонуний савдоси билан шуғулланиш фактлари аниқланган. Тадбиркор сифатида ҳеч қаерда рўйхатдан ўтмаган шахслар кўмир сотиш билан шуғулланган.
Кўмирни жойларга етказиб бериш жараёнида 11 та ҳолатда қарийб 1000 тонна кўмир 139 нафар шахс томонидан юриб кетаётган вагонларнинг ўзидан тушириб олиш ҳолатлари кузатилган. Оқибатда, кўмир омборларига белгиланган миқдордаги маҳсулот етиб бормаяпти.
Кўмирнинг ижтимоий соҳа объектларида мақсадли сарфланмаслиги бўйича 20 мингта жиноят иши қўзғатилган.Шунингдек, жойлардаги идораларнинг мансабдор шахслари томонидан аҳолига етказилиши керак бўлган суюлтирилган газни талон-торож қилиш ҳолатлари аниқланган. Хусусан, Самарқандда 289 миллион сўмлик 42 тонна, Қуйи Чирчиқда 492 миллион сўмлик 127 тонна суюлтирилган газ мансабдорлар томонидан ноқонуний сотилаётган чоғда аниқланган», — дейди Исмоилов.
Маълум қилинишича, куз—қиш мавсумига тайёргарлик ишлари бўйича 6300 дан ортиқ қонун бузилиши аниқланган. 100 дан ортиқ идорага тақдимнома киритилган, қўпол қонун бузилиш ҳолатлари бўйича 54 та жиноят иши қўзғатилган. 300 га яқин мансабдорга интизомий, 350 нафарига маъмурий чора кўрилган.
Бош прокуратура вакили аҳолига кўмир ва суюлтирилган газ етказиб беришда кузатилаётган талон-торожликларнинг сабабларига тўхталди.
«Етказиб бериш ва таъминот бўйича қонунчиликда бўшлиқ мавжуд эмас. Бу борада етарлича норматив-ҳуқуқий ҳужжатлар базаси шаклланган. Фақат муаммо жойлардаги мутасаддиларнинг тартибни тушунмаслиги, улар орасида тарғибот тадбирларининг етарли эмаслигидадир», — деди Беҳзод Исмоилов.
Аввалроқ Бухорода тўрт йилдан бери газсиз яшаётган ногиронлиги бор шахсга ОАВ аралашуви билан бир кунда газ берилгани ҳақида хабар берилганди.
Изоҳ (0)