Хитой Ташқи ишлар вазирлиги расмий вакили Хуа Чуньиннинг маълум қилишича, АҚШ дунёда коронавируснинг ҳақиқий ва энг йирик манбаига айланди. Мазкур баёнот АҚШ президенти Дональд Трамп «Хитой вируси» ҳақида яна бир марта эслатиб ўтганига жавобан қилинди, деб ёзмоқда «Интерфакс».
«АҚШга дунё аҳолисининг 4,2 фоизи тўғри келади, бироқ мамлакатда коронавирус билан касалланганлар сони бутун дунёда тасдиқланган ҳолатларнинг 22,2 фоизини ташкил қилмоқда. АҚШда ҳар бир миллион кишига дунёнинг бошқа мамлакатларидагидан беш марта кўп ўлим ҳолати тўғри келмоқда. Барча кўриб турибдики, ҳозир АҚШ ҳақиқий ва энг йирик вирус манбаига айланди», — дея маълум қилган Хитой ТИВ вакили.
Унинг қўшимча қилишича, баъзи тадқиқотлар коронавирус Хитойда пайдо бўлишидан аввал бошқа давлатларда тарқалганини кўрсатмоқда.
«Биз америкалик сиёсатчиларга фактлар ва фанга ҳурмат кўрсатишни ҳамда сиёсий манипуляция билан шуғулланишни тўхтатишни маслаҳат берамиз», — дея қайд этган Хуа Чуньин
Аввалроқ Дональд Трамп яна бир марта коронавирусни «Хитой вируси» деб атаган. Трамп шу пайтга қадар бу ҳақда бир неча марта гапирган ва бунинг учун Пекин томонидан танқид қилинган.
АҚШда 9 декабрь куни коронавирус оқибатида юзага келган ўлимлар сони бўйича янги антирекорд қайд этилди, бир кунда уч мингдан ортиқ одам вафот этди. Пандемия бошидан буён АҚШда 15 миллиондан ортиқ одам коронавирус билан касалланди, 289 мингдан ортиқ одам касаллик қурбонига айланди.
Изоҳ (0)