YouTube 9 декабрдан демократлар партиясидан АҚШ президентлигига номзод Жо Байден сайловда фирибгарлик йўли билан ғалаба қозонгани ҳақидаги маълумот ёки иддаоларни ўз ичига олган барча видеороликларни блоклайди, деб ёзади «РБК» компания хабарига таяниб.
«Биз одамларни 2020 йилги президент сайловлари натижасини ўзгартирган фирибгарликлар ёки хатоликлар ҳақида айтиб, одамларни чалғитиши мумкин бўлган ҳар қандай юкланувчи контентни ўчиришни бошлаймиз», — дейилади хабарда.
Шу билан бирга, компания «етарлича сондаги штатлар» Байденнинг ғалабасини тасдиқлаган ҳолда овоз бериш якунларини маълум қилганини қайд этди.
«Масалан, биз президентликка номзод дастурий таъминотдаги кенг тарқалган носозликлар ёки овозларни ҳисоблаш пайтидаги хатоликлар туфайли сайловда ғолиб бўлгани иддао қилинадиган видеороликларни ўчирамиз», — дея аниқлик киритди YouTube’дагилар.
Дональд Трамп 3 ноябрь куни бўлиб ўтган сайловларда мағлуб бўлганини тан олмай, сайлов натижалари қалбакилаштирилганини даъво қилмоқда. У баъзи муҳим штатларда овоз бериш якунлари қайта кўриб чиқилишини талаб қилиб, бунинг учун 9 миллион доллар ҳам сарфлади. Аммо бюллетенларнинг қайта санаб чиқилиши Байденнинг ғалабасини кўрсатди. Судлар ҳам амалдаги президент жамоасининг овоз бериш ва бюллетенларни ҳисоблаш жараёнидаги қонун бузилишлари ҳақидаги даъволарини рад этди.
Декабрь бошида Трамп сайловлар ҳалол бўлган тақдирдагина мағлубиятини тан олишини билдирганди. «Мен сайловда мағлуб бўлишга қарши эмас, балки у адолатли бўлишини хоҳлайман. Истамайдиган нарсам шуки, сайловлар Америка халқидан ўғирлаб олинмасин», — деди Трамп.
Кейинроқ АҚШнинг амалдаги президенти Дональд Трамп 2024 йилда давлат раҳбари лавозимига ўз номзодини қўйиши мумкинлигини билдирди.
Оқ уй эса Дональд Трамп президент сайловларида ғолиб чиққан демократ Жо Байденга ҳокимиятни тинч йўл билан топширишини ишонч билан билдирди.
Изоҳ (0)