Xitoy Tashqi ishlar vazirligi rasmiy vakili Xua Chuninning ma’lum qilishicha, AQSh dunyoda koronavirusning haqiqiy va eng yirik manbaiga aylandi. Mazkur bayonot AQSh prezidenti Donald Tramp “Xitoy virusi” haqida yana bir marta eslatib o‘tganiga javoban qilindi, deb yozmoqda “Interfaks”.
“AQShga dunyo aholisining 4,2 foizi to‘g‘ri keladi, biroq mamlakatda koronavirus bilan kasallanganlar soni butun dunyoda tasdiqlangan holatlarning 22,2 foizini tashkil qilmoqda. AQShda har bir million kishiga dunyoning boshqa mamlakatlaridagidan besh marta ko‘p o‘lim holati to‘g‘ri kelmoqda. Barcha ko‘rib turibdiki, hozir AQSh haqiqiy va eng yirik virus manbaiga aylandi”, — deya ma’lum qilgan Xitoy TIV vakili.
Uning qo‘shimcha qilishicha, ba’zi tadqiqotlar koronavirus Xitoyda paydo bo‘lishidan avval boshqa davlatlarda tarqalganini ko‘rsatmoqda.
“Biz amerikalik siyosatchilarga faktlar va fanga hurmat ko‘rsatishni hamda siyosiy manipulyatsiya bilan shug‘ullanishni to‘xtatishni maslahat beramiz”, — deya qayd etgan Xua Chunin
Avvalroq Donald Tramp yana bir marta koronavirusni “Xitoy virusi” deb atagan. Tramp shu paytga qadar bu haqda bir necha marta gapirgan va buning uchun Pekin tomonidan tanqid qilingan.
AQShda 9-dekabr kuni koronavirus oqibatida yuzaga kelgan o‘limlar soni bo‘yicha yangi antirekord qayd etildi, bir kunda uch mingdan ortiq odam vafot etdi. Pandemiya boshidan buyon AQShda 15 milliondan ortiq odam koronavirus bilan kasallandi, 289 mingdan ortiq odam kasallik qurboniga aylandi.
Izoh (0)