«Қўли қон, кимнингдир қотили бўлмаса, албатта, қайтади». Диний қўмита вакили Суриядан олиб келинадиган ўзбек эркаклари масаласида маълумот берди

Ўзбекистон Президенти Шавкат Мирзиёевнинг назорати остида 8 декабрь куни «Меҳр» операциясининг навбатдаги босқичи амалга оширилгани ҳақида хабар берилганди. Унга кўра, Суриянинг жанговар ҳаракатлари олиб борилаётган ҳудудларидан 98 нафар ўзбекистонлик, яъни 25 нафар аёл ва 73 нафар бола ватанга қайтарилди.

Бу операцияси бўйича аёллар ва болалардан ташқари эркакларни қайтарилиши ҳам режалаштирилганми, деган саволга Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Музаффар Комилов жавоб берди.

«Ушбу операция давомида биринчи навбатда энг муҳтож бўлган болалар ва аёллар олиб келиняпти.

Эркаклар масаласида ўрганиш керак бўлган жиҳатлар бор. Агарки, қўли қон бўлмаса, кимнингдир қотили бўлмаса, вақти келиб, Ватанга, албатта, қайтади», – деди Музаффар Комилов.

https://youtu.be/Mn29DjKWi5c?t=2845

Маълумот учун, Ўзбекистон раҳбарияти «Меҳр» инсонпарварлик операциясини илк бор 2019 йил май ойи охирида амалга оширган, ўшанда 156 нафар ўзбекистонлик, асосан аёллар ва болалар Uzbekistan Airways’нинг Сурия пойтахти Дамашқдан амалга оширилган махсус рейси билан Ўзбекистонга олиб келинган эди.

Кейинчалик ушбу операция давомида Ўзбекистон томони маълум бир қийинчиликларга дуч келгани аён бўлган эди. Хусусан, Ўзбекистон Президенти Шавкат Мирзиёев бир давлат Суриядан ватандошларни олиб қайтиш учун Ўзбекистон самолётини уриб тушириш билан таҳдид қилганини маълум қилган эди.

2019 йилнинг октябрь ойида эса Яқин Шарқдаги можаролар ҳудудидан ўзбекистонликларни қайтариш бўйича иккинчи махсус операция амалга оширилган.