Ўзбекистонда интернет хизматидан фойдаланувчилар сони 22,1 миллиондан ошди. Шундан мобил интернет фойдаланувчилари сони 19 миллион кишини ташкил қилмоқда. Бу ҳақда АКТ вазирлиги матбуот котиби Шерзод Аҳмадов 11 декабрь куни бўлиб ўтган матбуот анжуманида маълум қилди.
Вазирлик вакилининг маълумот беришича, Ўзбекистон бўйича аҳоли пунктларининг мобил алоқа билан қамраб олиниши даражаси 97 фоизга, мобил интернет қамрови эса 87 фоизга етган. 2020 йилнинг декабрь ойи бошида мактабларнинг 70 фоизи ва соғлиқни сақлаш муассасаларининг 78 фоизи интернетга уланган.
Шунингдек, оператор ва провайдерларга интернет хизматлари учун тариф 2019 йилнинг шу даврига нисбатан 36,1 фоизга арзонлаштирилиб, 1 мегабит/секунд учун 45 минг сўмни (4,3 доллар) ташкил этди.
Бугунги кунда халқаро интернет тармоғига уланишнинг умумий ўтказувчанлик қобилияти 1200 гигабит/секундни ташкил этмоқда.
«Оптик толали алоқа линияларини қуриш» лойиҳаси доирасида режалаштирилган объектларгача 19 минг километр оптик толали алоқа линиялари қурилиб, уларнинг умумий узунлиги 55,6 минг километрга етказилган.
Эслатиб ўтамиз, Президент Шавкат Мирзиёев раислигида 2020 йилнинг 11 май куни рақамли иқтисодиёт ва электрон ҳукуматни кенг жорий этиш масалалари бўйича ўтказилган йиғилишда 2020 йилда Ўзбекистонда оптик толали алоқа қамровини мактабгача таълим тизимида 41 фоиздан 100 фоизга, халқ таълимида 40 фоиздан 70 фоизга, соғлиқни сақлаш соҳасида 38 фоиздан 100 фоизга етказиш вазифаси белгилангани маълум қилинганди.
Изоҳ (0)