Шавкат Мирзиёев Беларусь президенти, Олий Евросиё иқтисодий кенгаши раиси Александр Лукашенконинг таклифига биноан 11 декабрь куни Евросиё иқтисодий иттифоқи (ЕОИИ)нинг видеоанжуман шаклида ўтадиган саммитида иштирок этди.
Ўзбекистонга ташкилот ҳузуридаги кузатувчи давлат мақомини бериш саммит кун тартибидаги асосий масалалардан бири эди. Мазкур масала юзасидан қарор қабул қилинди ҳамда Ўзбекистонга кузатувчи давлат мақоми берилди.
«Куба ва Ўзбекистон раҳбарларини уларнинг мамлакатларига Евросиё иқтисодий иттифоқининг кузатувчи мақоми берилгани билан чин қалбимдан табриклайман», — дейди Лукашенко саммит доирасида.
Тадбирда ЕОИИга аъзо давлатлар — Россия, Беларусь, Қозоғистон, Қирғизистон, Арманистон, шунингдек, кузатувчи мақомидаги Молдова ва таклиф этилган мамлакат сифатида Куба етакчилари иштирок этган.
Эслатиб ўтамиз, Президент Шавкат Мирзиёев январда парламентга йўллаган Мурожаатномасида ушбу масала ҳукумат томонидан парламент муҳокамасига киритилиши ва халқ вакиллари билан батафсил кўриб чиқилишини маълум қилган эди. Март ойининг бошларида эса Ўзбекистон ЕОИИга кузатувчи-давлат мақомида қўшилиши маълум бўлганди. Май ойида Олий Мажлис Ўзбекистоннинг ЕОИИ фаолиятида кузатувчи давлат мақомида иштирок этиши тўғрисидаги таклифни маъқуллаганди. Овоз бериш жараёнида 100 нафар сенатордан 91 нафари иштирок этган. Улардан 71 нафари қарорни маъқуллаб овоз берган, 16 сенатор қарши чиққан, тўрт сенатор бетараф қолган.
Изоҳ (0)