Финляндиянинг Эураёки шаҳрида жойлашган Олкилоуто атом электр станциясида 10 декабрь куни юз берган штатдан ташқари ҳодиса сабабли станция ичида радиация даражаси кўтарилди. Бу ҳақда «Интерфакс» хабар берди.
«Штатдан ташқари ҳолат радиацион мониторинг тизими станция ичида радиациянинг юқори даражасини аниқлагани билан боғлиқ», — дея маълум қилган Ядро ва радиацион хавфсизлик маркази бош директори Петтери Тийппана.
Унинг сўзларига кўра, станцияга туташ ҳудудларда яшайдиган аҳолининг хавфсизлигига таҳдид йўқ, улар хавфсиз ҳолатда.
Марказ раҳбарининг маълум қилишича, станцияда зудлик билан энг юқори ҳимоя чоралари кўрилган. Штатдан ташқари ҳолатни кўрсатган реакторда фавқулодда автоматик ўчириш амалга оширилган.
«Ҳозирги пайтда объект барқарор ва хавфсиз ҳолатда. Кун давомида радиация даражасининг кўтарилиши қайта кузатилмади, бироқ ҳозирча нима сабабдан объектда радиация кўтарилгани номаълум», — деди Тийппан.
АЭСга эгалик қилувчи Теоллисууден Воима компаниясининг бош директори Ярмо Танхуанинг маълум қилишича, фавқулодда ҳолат реакторнинг одатда радиация юқори бўладиган биноси ичида юз берган, шу сабабли ишчилар у бинога ҳеч қачон кирмайди. «Шу сабабли ҳодиса улар учун хавф туғдирмайди», — деб ҳисоблайди Танхуа.
У гап реактор сувини тозаловчи фильтрация тизими ҳақида кетаётган бўлиши мумкинлигини истисно қилмаган. Радиацион сувнинг бир қисми реакторга тушган ва шу сабабли ҳалокат сигнали ишлаб кетган бўлиши мумкин.
Танхуа ҳозирча станция ичида радиация қанчалик кўтарилганини айта олмаган. Унинг сўзларига кўра, «бу АЭС тарихидаги ягона ҳолат, аввал станцияда бунга ўхшаш ҳолат юз бермаган».
Изоҳ (0)