Африка ривожланган давлатлардан коронавирусга қарши вакциналарнинг ортиқчасини беришни сўради

Африка иттифоқининг касалликлар назорати ва олдини олиш марказлари директори Жон Нкенгасонгнинг маълум қилишича, баъзи мамлакатлар жуда кўп миқдорда коронавирусга қарши вакцина ғамлаб қўйган. Бу ҳақда «Интерфакс» хабар берди.

Нкенгасонгнинг қайд этишича, кўп миқдорда вакцина ғамлаётган давлатлар ортиқча вакциналарни улар етишмаётган Африка давлатлари билан бўлишиши керак. «Баъзи мамлакатлар уларга керак бўлганидан уч-тўрт, беш марта кўп вакцинага эга», — дея таъкидлаган директор.

Унинг фикрича, мазкур давлатлар камбағал давлатларга аҳолини эмлаш кампаниясини ишга туширишга ёрдам бериши мумкин. Бироқ у жуда кўп миқдорда вакцина харид қилган давлатлар номини айтмаган.

Унинг таъкидлашича, БМТ COVID-19’га қарши вакцинани адолатли равишда олиш ва уларни тақсимлаш масаласига бағишланган махсус йиғилиш ўтказиши зарур.

Нкенгасонгнинг маълум қилишича, Африкада коронавирус билан касалланиш ҳолатлари яна ортмоқда. Унинг билдиришича, Африкада аллақачон коронавируснинг иккинчи тўлқини бошланган.

The Guardian нашрининг ёзишича, Африка иттифоқининг касалликлар назорати ва олдини олиш марказлари Жаҳон банки ва Afreximbank банки билан Африка мамлакатлари ўртасида коронавирусга қарши вакциналарни тақсимлаш учун маблағ йиғиш мақсадида иш олиб бормоқда. Октябрь ойида Нкенгасонг Afreximbank бу мақсадлар учун 5 миллиард долларгача йиғиши мумкинлигини маълум қилган.

The Guardian’нинг хабар беришича, 70 та камбағал мамлакат аҳолиснинг 10 нафаридан 9 киши 2021 йилда коронавирус вакцинасини қабул қила олмайди, чунки ғарб мамлакатлари аллақачон энг истиқболли саналаётган вакциналарнинг катта қисмини сотиб олган.

Сайёра аҳолисининг 14 фоизи истиқомат қиладиган ривожланган давлатлар аллақачон ўзини вакциналар билан таъминлаб бўлган. Pfizer томонидан яратилган вакцинанинг 96 фоизини ғарб мамлакатлари сотиб олган. Moderna томонидан яратилган вакцинани ҳам фақат ривожланган мамлакатлар аҳолиси олиши мумкин, иккала вакцинанинг ҳам нархи баланд. Бундан ташқари, бу вакциналарни жуда паст ҳароратда сақлаш керак. AstraZeneca компанияси эса аксинча, ўз вакцинасининг 64 фоизини ривожланаётган мамлакатларга жўнатишни мўлжалламоқда.

Аҳоли жон бошига энг кўп вакцина Канада томонидан харид қилинган. Ҳар бир канадалик хоҳишига кўра коронавирусга қарши беш марта эмлаш олиши мумкин.