Ижтимоий тармоқларда Андижон шаҳрининг «Ҳамдўстлик» маҳалла фуқаролар йиғини аҳолиси бир қатор масалалар юзасидан ўз норозиликларини билдириб, шаҳарнинг Ўзбекистон кўчаси ва Бобур шоҳкўчаси кесишмасидаги йўлнинг қатнов қисмини тўсишга уринаётгани акс этган видеолар тарқалди. «Kun.uz»нинг хабар беришича, воқеа 10 декабрь куни кеч соат 19:20 атрофида юз берган.
Нашрнинг ёзишича, воқеа жойига вилоят ҳокими ўринбосари Иброҳимжон Холматов, Андижон шаҳри ҳокими Баҳромжон Ҳайдаров, сектор раҳбарлари, «Ҳудудгаз Андижон» мутасаддилари етиб борган. Аҳоли билан учрашув ўтказилиб, уларнинг шикоятлари тингланган.
«Ҳудудгаз» газ таъминоти филиали бош муҳандиси Акрамжон Мирзаҳматовнинг маълум қилишича, фуқароларнинг газ таъминоти билан боғлиқ саволларига ойдинлик киритиш мақсадида «Ҳудудгаз Андижон» газ таъминоти филиали ва «Андижоншаҳаргаз» газ таъминоти бўлими ходимлари ўрганиш олиб борди.
«Таъкидлаш жоизки, шу кунларда Андижон вилоятидаги аҳоли пунктларини табиий газ билан таъминлашда босимнинг кескин пасайиши кузатилмоқда. «Ўзтрансгаз» АЖ томонидан тақдим этилган факсограмма маълумотига кўра, ‘Янгиер’ компрессор станциясида авария ҳолатлари юзага келгани сабабли Фарғона водийсига газ келтирувчи магистрал газ қувурларида босим пасайиши кузатилган.
Шунга кўра, Андижон вилояти, хусусан Андижон шаҳрининг ‘Ҳамдўстлик’ МФЙ ҳудудида ҳам газ таъминотида узилишлар юзага келган», — деди Акрамжон Мирзаҳматов.
Бош муҳандиснинг қўшимча қилишича, «Кўмакай» газ тақсимлаш шохобчасидаги «Андижон-1» тармоғининг табиий газ етказиб берувчи қувурларида табиий газ босими пасайиши натижасида 1,5 мингдан зиёд аҳоли хонадонларининг газ таъминотида ҳам қийинчиликлар вужудга келган.
Маълум қилинишича, айни вақтда аҳоли пунктларидаги газ таъминотини тиклаш ишлари олиб борилмоқда.
Аввалроқ Бухоро вилоятининг Бухоро ва Қоракўл туманларида аҳоли газ билан боғлиқ муаммолардан норози бўлиб йўлларни тўсганди.
Изоҳ (0)