Ўзбекистон Президенти Шавкат Мирзиёев 11 декабрь куни Туркманистон президенти Гурбангули Бердимуҳамедов билан телефон орқали мулоқот қилди. Бу ҳақда Президент матбуот хизмати хабар берди.
Суҳбат аввалида Шавкат Мирзиёев Туркманистон етакчиси ва қардош туркман халқини ушбу мамлакат бетарафлигининг 25 йиллиги билан самимий муборакбод этиб, тинчлик, фаровонлик, тараққиёт ва равнақ тилади.
Мулоқот чоғида икки томонлама ҳамкорликка оид ва халқаро аҳамиятга молик долзарб масалалар кўриб чиқилди.
«Президентлар Ўзбекистон ва Туркманистон ўртасидаги кўп асрлик дўстлик, яхши қўшничилик ва стратегик шериклик муносабатларида юксак даражага эришилгани ва бугун улар жадал суръатда ривожланиб бораётганини катта мамнуният билан қайд этди», — дейилади хабарда.
Савдо, саноат кооперацияси, қишлоқ хўжалиги, энергетика, транспорт ва транзит, ҳудудлараро ришталар ва гуманитар дастурлар каби муҳим соҳалардаги ҳамкорликнинг устувор йўналишлари белгиланди.
Амалий ҳамкорликнинг янги шаклларини йўлга қўйишга ҳамда коронавирус инфекцияси тарқалишига қарши кураш борасида тадқиқотлар ўтказиш мақсадида қўшма тузилма ташкил этишга келишиб олинди.
Олий даражада эришилган келишувларни сўзсиз рўёбга чиқаришда қўшма ҳукуматлараро комиссиянинг самарали иши ва фаол идоралараро мулоқот муҳим ўрин тутиши алоҳида таъкидланди.
Давлат раҳбарлари жаҳондаги вазият юзасидан фикр алмашди, Бирлашган Миллатлар Ташкилоти ва бошқа халқаро тузилмалар доирасидаги анъанавий яқин мулоқотларни ва ўзаро қўллаб-қувватлашни давом эттиришга келишиб олди.
Президентлар минтақавий ҳамкорлик истиқболларига алоҳида тўхталди, шунингдек, бўлажак МДҲ саммитига тайёргарликни муҳокама қилди.
Эслатиб ўтамиз, Шавкат Мирзиёев 11 декабрь куни Евросиё иқтисодий иттифоқи (ЕОИИ)нинг видеоанжуман шаклида ўтган саммитида иштирок этди. Саммитда Ўзбекистонга Евросиё иқтисодий иттифоқининг кузатувчи аъзоси мақоми берилди.
Шунингдек, Ўзбекистон Президенти 11 декабрь куни Ҳиндистон бош вазири Нарендра Моди билан видеоанжуман шаклида учрашув ўтказди.
Кун давомида Шавкат Мирзиёев Озарбайжон президенти Илҳом Алиев билан телефон орқали мулоқот қилди ҳамда ҳамкасбини Тоғли Қорабоғдаги ҳарбий ҳаракатларнинг якунлангани билан табриклади.
Изоҳ (0)