2020 йилнинг ўтган даврида 1110 нафар I ва II гуруҳ ногиронлиги бўлган ҳамда мустақил ҳаракатланиш имкониятига эга бўлмаган фуқарога пенсия ва нафақа маблағлари уларнинг яшаш манзилларига ўз вақтида етказиб берилмаган. Бу ҳақда Молия вазирлиги ҳузуридаги бюджетдан ташқари Пенсия жамғармаси «Дарё»га маълум қилди.
Ўзбекистон Президентининг 2017 йил 13 мартдаги ПҚ-2826-сонли қарорларига мувофиқ, пенсия ва нафақалар АТ «Халқ банки» махсус кассалари томонидан маҳалла фуқаролар йиғинлари биносида амалга оширилади. Ушбу қарорда мустақил ҳаракатланиш ҳамда пенсиялар ва нафақаларни махсус кассалардан олиш имкониятига эга бўлмаган шахсларга пенсиялар ва нафақалар «Халқ банки» томонидан бевосита улар яшайдиган жойга етказиб берилиши белгиланган.
Хусусан, пенсия ва нафақа тўловларини ўз вақтида амалга оширилиши учун маблағлар Пенсия жамғармаси томонидан муддатидан аввал ҳар ойнинг 13—14-санасига қадар тўлиқ молиялаштирилмоқда (амалдаги тартиб бўйича 27-санасига қадар).
Юқоридагиларга мувофиқ, АТ «Халқ банки»нинг махсус кассалари томонидан ётоқдаги ва ногиронлиги бўлган шахсларга тўловлар бевосита уларнинг яшаш манзилларига етказилмоқда. Бироқ 2020 йилнинг ўтган даврида 1110 нафар I ва II гуруҳ ногиронлиги бўлган ҳамда мустақил ҳаракатланиш имкониятига эга бўлмаган фуқарога пенсия ва нафақа маблағлари уларнинг яшаш манзилларига ўз вақтида етказиб берилмагани аниқланган.
Жамғарманинг маълум қилишича, аниқланган камчиликлар жойида бартараф этилиб, айбдор ходимларга тегишли интизомий жазо чоралари кўриб борилмоқда.
Аввалроқ Наманган, Навоий ва Самарқандда сайёр кассалар томонидан пенсия тўловларини кеч тўлаш ҳолатлари аниқланган эди.
Изоҳ (0)