Коррупционерлар шахси ҳақидаги маълумотлар эълон қилиб бориладиган платформа ишлаб чиқилмоқда – Акмал Бурҳонов

Коррупцияга қарши курашиш агентлиги директори Акмал Бурҳонов коррупцион жиноятларга қўл уриб, жавобгарликка тортилган шахсларни ҳар бир соҳа кесимида очиқлаш режалаштирилганини маълум қилди, дея хабар бермоқда «Kun.uz».

Агентлик раҳбарининг қайд этишича, айни пайтда «E-antikor» платформаси устида иш олиб борилмоқда.

«Шу платформада коррупцион жиноятларга қўл уриб, жавобгарликка тортилган шахсларни ҳар бир соҳа кесимида очиқлашни режалаштирганмиз. Ҳар олти ойда ёки муайян даврий оралиқда бу маълумотларни интернетга жойлаб борамиз.

Бунинг вақти келди ва энг асосийси, вазирлик ва идораларнинг ўзлари ҳам бунга — соҳаларини тозалашга тайёр.

У ёки бу давлат идорасида битта коррупцион хатти-ҳаракат бўлса, бутун тизим нуфузига путур етишини раҳбарлар тушуниб етишди. Бугунги кунда коррупциявий хатар юқори бўлган соҳаларнинг раҳбарияти ҳам, ҳуқуқни муҳофаза қилувчи идоралар ҳам мана шундай жиноятга қўл урганларни очиқ-ойдин кўрсатишга тайёрлигини билдиряпти», — деди Бурҳонов.

Аввалроқ Акмал Бурҳонов амалдорларнинг хизмат автомобилларидан фойдаланишини танқид қилганди.