«Росселхознадзор» 14 декабрдан бошлаб Арманистоннинг Армавир вилоятида етиштирилган помидор ва қалампирларнинг Россия ҳудудига олиб кирилишини тақиқлаб қўйди. Бу ҳақда идора сайтида эълон қилинган хабарда сўз боради.
Ушбу қарор Армавир вилоятида етиштириладиган сабзавотларда пепино мозаикаси вируси аниқлангани сабаб қабул қилинган. Фитосанитария назорати вирусни октябрь ойида аниқлаган.
«‘Росселхознадзор’ билан ўтказилган учрашув якунларига кўра, Россия сабзавотларни олиб келишга масъул идоралардан назоратни кучайтириш, шунингдек, текширув натижалари ва амалга оширилган фитосанитария чоралари бўйича маълумот бериш сўралди», — дейилади хабарда.
«Росселхознадзор»нинг таъкидлашича, Арманистон томони ҳозирча мазкур ҳолатга ҳеч қандай жавоб қайтармаган, бу эса «Арманистон фитосанитария назорати тизимининг Россияга пепино мозаика вирусидан ҳоли маҳсулотларни олиб киришни таъминлашга тайёр эмаслигидан далолат бериши мумкин».
Маълумотларга кўра, 2020 йилда Арманистон Россияда жами 21,8 миллион долларлик 20,3 минг тонна помидор сотган. 2019 йил якунлари бўйича, Арманистон Россияга помидор импорт қилувчи давлатлар орасида саккизинчи ўринни эгаллаган.
Аввалроқ «Росселхознадзор» 10 декабрдан Озарбайжонда етиштирилган помидор ва олмаларнинг Россияга олиб кирилишини тақиқлаши маълум бўлганди. Бунга ушбу маҳсулотларда зараркунандалар топилгани сабаб бўлган.
Мавзуга доир:
Изоҳ (0)