Эрон ҳукумати ядрошунос олимнинг ўлдирилишига алоқадор шахслар қўлга олинганини маълум қилди

Эрон ҳукумати ядрошунос физик олим Муҳсин Фахризоданинг ўлдирилишига алоқадорликда гумон қилинаётган бир неча кишини қўлга олди, деб ёзади «РБК» мамлакат парламенти раисининг халқаро масалалар бўйича ёрдамчиси Ҳусайн Амир Абдуллоҳиёнга таяниб.

«Ушбу қотилликни амалга оширишда қатнашган шахслар одил суддан қочиб қутула олмайди, уларнинг бир қисми бизнинг хавфсизлик хизматларимиз томонидан аниқланди ва қўлга олинди», — деди мансабдор.

Қўлга олинганлар ҳақидаги бирорта ҳам тафсилотни Абдуллоҳиён ошкор қилмади, бу маълумотларни хавфсизлик хизматлари эълон қилиши мумкинлигини айтди. Шу билан бирга у қотилликда Исроилнинг ҳам қўли борлигини таъкидлади. Шунингдек, унинг сўзларига кўра, «Америка ёки бошқа мамлакатлар махсус хизматлари» ҳам иштирок этган бўлиши мумкин.

Аввалроқ Эрон разведка хизмати ядро физиги Муҳсин Фахризоданинг ўлдирилишини ташкиллаштирган кишиларнинг шахсини аниқлаган эди.

Муҳсин Фахризода Эрон Мудофаа вазирлиги ҳузуридаги тадқиқот марказига раҳбарлик қилган. У 27 ноябрь куни Теҳрон провинциясининг Дамовенд шаҳрида ўлдирилган. Олимга тўхтаб турган машинадан ўқ узилган, у касалхонада вафот этган.

Воқеадан сўнг Эрон президенти хавфсизлик чораларини кучайтириш ҳақида топшириқ берди. Эрон ўлдирилган ядро физиги учун қасос олишга ваъда берди. Туркия эса минтақада тинчликни бузмасликка чақирди.

Олимнинг ўлдирилиши ортидан Эрон ядровий фаолиятини қайта тиклашни режалаштирмоқда, мамлакат парламенти мамлакатнинг ядровий фаолиятини тиклаш бўйича лойиҳанинг умумий қоидаларини маъқуллади.

Эрон ҳукумати олимнинг ўлдирилиши учун жавобгарликни Исроилнинг зиммасига юклади. Эрон парламентининг миллий хавфсизлик ва ташқи сиёсат комиссияси расмий вакили Абулфазл Амуий сўзларига кўра, суиқасд Исроил махсус хизматлари томонидан уюштирилган, бошқа мамлакатлар разведкалари ҳам жалб қилинган бўлиши мумкин. Исроил Фахризоданинг ўлдирилиши юзасидан изоҳ бермади.

Эронда аввал ҳам ядро дастурига алоқадор олимларнинг ўлдирилиши ҳолатлари юз берган, мамлакат ҳукумати ҳар сафар Исроилнинг «Моссад» разведкасини айблаган. Хусусан, 2010 йил январида Теҳрондаги теракт оқибатида ядрошунос физик олим, имом Ҳусайн номидаги Теҳрон университети профессори Маъсуд Али Муҳаммадий ҳалок бўлган. 2012 йил майида Теҳронда суд томонидан Исроилнинг «Моссад» ташқи разведкаси манфаатлари йўлида олимнинг ўлдирилишини ташкиллаштиришда ва террорчилик фаолиятини амалга оширишда айбдор деб топилган Мажид Жамолий Фаший қатл қилинган эди.