Ўзбекистонда ота-она қарамоғидан маҳрум бўлган болалар учта тоифадаги муассасаларда: Соғлиқни сақлаш вазирлиги тасарруфидаги болалар уйлари, Халқ таълими вазирлигига қарашли меҳрибонлик уйлари, болалар шаҳарчалари ва уларга тенглаштирилган SOS болалар маҳаллаларида тарбияланади. Болаларни фарзандликка олишда ушбу муассасалар асосий ўрин тутади. Бу ҳақда 4 декабрь куни ўтказилган Одам савдоси ва мажбурий меҳнатга қарши курашиш Миллий комиссиясининг навбатдаги йиғилишида сўз юритилди. Бу ҳақда «Дарё» мухбири хабар берди.
«Барчамиз яхши биламиз, бугунги кунда республикамизда васийлик ва ҳомийлик соҳасидаги фаолият Вазирлар Маҳкамаси, Халқ таълими ва Соғлиқни сақлаш вазирликлари ҳамда маҳаллий давлат ҳокимияти органлари томонидан «Васийлик ва ҳомийлик тўғрисида»ги қонунга асосан юритилади. Вояга етмаган болаларни фарзандликка ва оилага тарбияга олиш ҳам васийлик ва ҳомийлик органларининг хулосаларига кўра судлар томонидан амалга оширилади.
Таҳлил қилиб кўрилганда болалар уйлари, меҳрибонлик уйлари, болалар шаҳарчалари ва уларга тенглаштирилган SOS болалар маҳаллаларидан бир йилда ўртача 220-230 нафар бола оилаларга фарзандликка берилмоқда», — деди Олий Мажлис Сенати раиси Танзила Норбоева.
«Васийлик ва ҳомийлик органлари томонидан жорий йилнинг январь–август ойлари давомида ота-она қарамоғидан маҳрум бўлган, шунингдек, ижтимоий ёрдамга муҳтож бўлган 2 минг 747 нафар бола фарзандликка, 3 минг 954 нафар бола васийликка, 1 минг 534 нафар бола ҳомийликка, 288 нафар бола оилага тарбияга (патронатга) берилган. Бундан кўриш мумкинки, васийлик ва ҳомийлик органлари орқали фарзандликка берилган болалар орасида меҳрибонлик уйлари ва болалар шаҳарчаларида тарбияланаётган болалар улуши 10 фоизни ҳам ташкил қилмайди.
90 фоиздан ортиқ ҳолатларда фарзандликка олувчилар билан фарзандликка берувчилар ўзаро бир-бирларини топишмоқда. Яъни улар давлат томонидан ташкил қилинган ташкилотлар орқали эмас, балки таниш-билишчилик, қариндош-уруғлар ёрдамида болани фарзандликка олишяпти. Мазкур ҳолатлар ўрганилганда ўзаро қариндош бўлмаган шахслар томонидан фарзандликка олинаётган боланинг чақалоқ савдоси қурбони бўлган ёки бўлмаганлигини аниқлаш механизми мавжуд эмаслиги ҳам аниқланди», — деди комиссия раиси.
Мавзуга доир:
- Ўзбекистонда чақалоқлар савдоси йилдан йилга ортиб бормоқда. Бундай жиноятларнинг сабаблари маълум қилинди
- Ўзбекистонда 2021 йилда чин етим болаларни уй-жой билан таъминлаш учун 30 млрд сўм ажратилиши маълум қилинди
- Тошкентда икки йилдан буён Меҳрибонлик уйлари битирувчиларига нафақа тўланмаяпти. Шаҳар молия бошқармаси бунга изоҳ берди
- «Уй йўқ, ҳужжат йўқ, ҳуқуқ ҳам йўқоладими?» Меҳрибонлик уйлари битирувчиларига уй ажратиш муаммоси тизимли ҳал этилиши зарур
- Олий Мажлис Сенати етим болаларнинг жамиятга ижтимоий мослашуви юзасидан бош вазир номига хат йўллайди
Изоҳ (0)