Ўзбекистонда чақалоқлар савдоси йилдан-йилга ортиб бормоқда. Бундай жиноятларнинг сабаблари маълум қилинди

Ўзбекистонда одам савдоси жиноятлари сони охирги беш йилда 6 баробарга камайган. Аммо ушбу турдаги жиноятлар ичида чақалоқ ва болалар савдоси билан боғлиқ жиноятлар салмоғи ҳар йили сурункали равишда ортиб боряпти. Бу ҳақда 4 декабрь куни ўтказилган Одам савдоси ва мажбурий меҳнатга қарши курашиш Миллий комиссиясининг навбатдаги йиғилишида сўз юритилди, дея хабар бермоқда «Дарё» мухбири.

Олий Мажлис Сенати раиси Танзила Норбоеванинг айтишича, охирги уч йилда чақалоқ савдосидан жами 114 нафар бола жабрланган. Уларнинг асосий қисми, яъни 89 фоизи 1 ёшгача бўлган болалар ҳисобланади.

«Маълумки, бугунги кунда одам савдоси жиноятлари оқибатида дунёнинг барча ҳудудларида кўплаб инсонлар жабр чекмоқда ва бу жамиятнинг ижтимоий барқарорлигига жиддий хавф туғдиряпти. Ачинарлиси, ер юзида одам савдоси қурбони бўлаётган шахсларнинг 30 фоизини болалар ташкил этмоқда. Бу каби ҳолатлар, афсуски, республикамизда ҳам мавжуд.

Мамлакатимизда 2018 йилда одам савдоси жиноятлари ичида чақалоқ савдосининг улуши 38 фоизни, 2019 йилда эса 44 фоизни ташкил қилган. 2017–2020 йиллардаги ҳолатлар таҳлили шуни кўрсатмоқдаки, ўз чақалоғини сотган аёлларнинг 31 фоизи оғир ижтимоий аҳволда эканлиги сабабли, 17 фоизи ҳомилани яшириш, 52 фоизи эса моддий манфаат топиш мақсадида ушбу жиноятларни содир этган. Чақалоқ сотиб олувчи шахслар билан суҳбат ўтказилганда улар бу ишга фарзанди бўлмагани, оиласини сақлаб қолиш чораси сифатида қўл ургани, бола ўз ақлини таниб олмасдан, кичиклигида асраб олишим керак ва ўз болам сифатида катта қилишимга бу яхши бўлади, деган важни келтиришяпти», — деди Норбоева.