Сирдарёда 1,5 ёшли боласини 17 минг долларга сотган онага ҳукм ўқилди

Сирдарё вилоятида 1,5 ёшли фарзандини 17 минг АҚШ долларига сотган она қўлга олинди, дея хабар бермоқда ЎзА.

Маълум қилинишича, сирдарёлик А.Ўринбоева 2020 йилнинг июль ойида ўз ҳамшаҳари Х.Маматқулов билан танишиб, ҳозирда шароити оғирлиги ва моддий томондан қийналганлиги сабабли пул кераклигини, бунинг эвазига ўз фарзанди — 2019 йил 12 июлда туғилган Л.Ўринбоевани 17 минг АҚШ долларига сотишини айтади.

Х.Маматқулов бу ҳақда Департаментнинг Сирдарё вилояти ҳамда вилоят ички ишлар бошқармаларига ариза билан мурожаат қилади.

Қайд этилишича, 2020 йилнинг 21 июль куни кундузи соат 12:00 лар атрофида унинг аризасига асосан Департаментнинг вилоят бошқармаси ва Сирдарё вилоят ИИБ ходимлари билан ҳамкорликда Гулистон шаҳар 2-мавзе «Намуна» маҳалласида жойлашган «Зомин» тўйхонасининг ёнидаги қурилиши тугалланмаган бинонинг ёнида тезкор тадбир ўтказилган.

Унда А.Ўринбоева ўзининг 2019 йил 12 июлда туғилган фарзанди Л.Ўринбоева вояга етмаган ва ожиз аҳволдалигини била туриб, уни «махсус харидор»га 17 минг АҚШ долларига сотаётганда қўлга олинган.

Суд мазкур жиноят ишини кўриб чиқиб, А.Ўринбоевани Жиноят кодексининг 135-моддаси 3-қисми «а» банди (ўн саккиз ёшга тўлмаганлиги айбдорга аён бўлган шахс олди-сотдиси — одам савдоси) билан айбдор деб топди ва унга Жиноят кодексининг 57-моддаси (енгилроқ жазо тайинлаш) қўлланилиб, 5 йил озодликдан маҳрум қилиш жазосини тайинлади.

Аввалроқ Сирдарёда тўрт кунлик чақалоғини 20 минг долларга сотаётган аёл, Хивада 4 ойлик қизини 120 миллион сўмга сотмоқчи бўлган аёл ҳамда Наманганда 6 ойлик чақалоғини 1,9 миллион сўмга сотиб юборган турмушга чиқмаган аёл қўлга олингани ҳақида хабар берилганди.