Ўзбекистонда ҳафта давомида кутилаётган об-ҳаво маълум қилинди

Ўзбекистонда 7 декабрда кундузги об-ҳаво шароитини Урал устида жойлашган кучли совуқ антициклон периферияси белгилайди, деб хабар бермоқда «Ўзгидромет».

Республика ҳудудларининг кўп қисмида ёғингарчиликсиз об-ҳаво сақланиб туради, фақат Сурхондарё вилоятида, кечга қараб эса Андижон, Наманган, Фарғона вилоятларида бир оз ёмғир ва қор ёғиши мумкин.

Ҳарорат фони меъёрий қийматлардан 6—8 даражага паст бўлиши сақланиб туради ва 0—5 даража илиқни ташкил этади.

8 декабрда мамлакатнинг баъзи ҳудудларида бир оз қор ёғади, Қорақалпоғистонда, Хоразм, Бухоро, Навоий вилоятларида ёғингарчилик кутилмайди.

Фақат Тошкент, Андижон, Наманган, Фарғона вилоятларида 9 декабрь, чоршанба куни ёғингарчилик бўлиши эҳтимоли сақланиб туради. 10—11 декабрда об-ҳаво ёғингарчиликсиз бўлади.

Ҳафта давомида ҳаво ҳарорати кечалари 2—7 даража совуқ, кундуз кунлари 0—5 даража илиқ атрофида бўлади, шунингдек, бу кунларнинг иқлимий меъёридан 6—9 даражага паст бўлади.