Қирғизистон бош вазири вазифасини бажарувчи Артём Новиков Боткен ва Ўш вилоятларига ташриф буюради. Бу ҳақда Қирғизистон ҳукумати матбуот хизмати хабар берди.
Маълум қилинишича, 7—9 декабрь кунлари бош вазир вазифасини бажарувчи, Қирғизистон бош вазирининг биринчи ўринбосари Артём Новиков Боткен ва Ўш вилоятларига боради. Новиков сафар доирасида саноат объектлари фаолияти билан танишади, Исфана шаҳридаги аэропортнинг очилиш маросимида иштирок этади ва Қадамжой шаҳрида касалхона қурилишини кўздан кечиради.
«Шунингдек, амалий ташриф доирасида бош вазир вазифасини бажарувчи жорий йил 8 декабрь куни Ўзбекистоннинг Фарғона шаҳрида бўлиб ўтадиган Қирғизистон ҳукуматининг чегараолди вилоятларда ваколатли вакиллари ҳамда Ўзбекистон чегараолди вилоятлари ҳокимлари кенгаши йиғилишида иштирок этади», — дейилади хабарда.
Сафар якунида Артём Новиков «Иркештам» назорат-ўтказиш пункти фаолияти билан танишади.
Эслатиб ўтамиз, Қирғизистон ташқи ишлар вазири Руслан Казакбаев бошчилигидаги делегация 5—6 ноябрь кунлари амалий ташриф билан Ўзбекистонда бўлиши хабар берилган эди. 5 ноябрь куни Ўзбекистон ташқи ишлар вазири Абдулазиз Комилов Руслан Казакбаев билан учрашиб, сиёсий, савдо-иқтисодий, инвестиция, транспорт-коммуникация, сув хўжалиги ва маданий-гуманитар соҳаларида Ўзбекистон–Қирғизистон ҳамкорлигининг ҳозирги ҳолати ва уни янада ривожлантириш истиқболларини муҳокама қилган.
Изоҳ (0)