Xivada 4 oylik qizini 120 mln so‘mga sotmoqchi bo‘lgan ayol qo‘lga olindi

Xorazm viloyati XIva shahrida 4 oylik qiz chaqalog‘ini 120 million so‘m evaziga sotmoqchi bo‘lgan 22 yoshli ayol qo‘lga olindi. Bu haqda Ichki ishlar vazirligi huzuridagi Tergov departamenti xabar berdi.

Ma’lum qilinishicha, 2020-yilning 28-oktabr kuni Xorazm viloyat IIB va DXX Xiva shahar bo‘limi xodimlari bilan hamkorligida tezkor tadbir o‘tkazilgan. 22 yoshli S.M. moddiy daromad orttirish maqsadida 2020-yilning 2-iyun kuni tug‘ilgan 4 oylik qiz farzandi Z.M.ni tadbirga jalb qilingan fuqarolar I.X. va N.R.ga 120 million so‘m evaziga sotishga kelishgan. Ayol kelishilgan pulning 5 ming dollarini olib, qizi Z.M.ni sotgan paytida tadbir ishtirokchilari tomonidan ashyoviy dalillar bilan ushlangan.

Mazkur holat yuzasidan Xiva shahar IIB huzuridagi tergov guruhi tomonidan S.M.ga nisbatan O‘zbekiston Respublikasi Jinoyat kodeksining 135-moddasi 3-qismi “a” bandi (o‘n sakkiz yoshga to‘lmaganligi aybdorga ayon bo‘lgan shaxsga nisbatan sodir etilgan odam savdosi) bilan jinoyat ishi qo‘zg‘atilgan.

Jinoyat ishi bo‘yicha S.M. gumon qilinuvchi tariqasida jalb qilinib, protsessual tartibda ushlangan. Hozirda tergov harakatlari davom ettirilmoqda.