«Намангандан шу вақтгача бирор марта ‘гард’ чиқмаган эди». Танзила Норбоева – Наманган мажбурий меҳнат сабаб бутун дунёга «машҳур» бўлгани ҳақида

Наманган вилоятида мажбурий меҳнатга қарши 2013 йилдан бери ўтказилган мониторингларда бирор марта «гард» ҳам чиқмаган эди, бироқ 2020 йилги пахта терими мавсумида барча саъй-ҳаракатлар йўққа чиқди. Бу ҳақда Сенат раиси Танзила Норбоева Одам савдосига ва мажбурий меҳнатга қарши курашиш Миллий комиссиясининг 4 декабрь куни бўлиб ўтган йиғилишида айтиб ўтди.

Таъкидланишича, 2020 йилда пахта мавсуми билан боғлиқ энг кўп мажбурий меҳнат ҳолати Наманган вилоятида аниқланган — республика бўйича қайд этилган ҳолатларнинг 42,2 фоизи ушбу ҳудуд ҳисобига тўғри келади. Жумладан, Поп тумани ҳокими мажбурий меҳнатга йўл қўйгани учун жаримага тортилган, Чортоқ ва Учқўрғон туманлари ҳокимларига эса Вазирлар Маҳкамаси фармойиши билан ҳайфсан берилган.

Йиғилишда сўзга чиққан Наманган ҳокими Шавкат Абдураззоқов вилоятда мажбурий меҳнатга қарши ташкил қилинган ишлар етарли бўлмаганини, «аҳоли ва маҳалла билан ишланмагани»ни тан олган. «Вилоят кесимида мониторинг ўтказганимизда, 28 нафар мансабдор шахсга маъмурий жарима жазосини қўллаганмиз. Бундай камчиликлар такрорланмаслиги учун бор кучимиз билан ҳаракат қиламиз», – деб қўшимча қилган ҳоким.

Комиссия раиси Танзила Норбоеванинг таъкидлашича, бундай ҳолат Наманган тарихида 2013 йилдан бери бўлмаган эди, дея хабар бермоқда «Дарё» мухбири Бекжон Жўрақулов.

Наманган вилоятида тарихда бундай ҳолат бўлмаган. Биз мажбурий меҳнатга қарши 2013 йилдан бери мониторинг ўтказаётган бўлсак, бир марта ҳам «гард» чиқмаган эди. Бу йил Наманган бутун дунёга «машҳур» бўлди. Бундай ҳолат бошқа қайтарилмаслигига ишонч билдирамиз.

Танзила Норбоева, Сенат раиси

Қайд этиш жоиз, Одам савдосига ва мажбурий меҳнатга қарши курашиш Миллий комиссиясининг ҳисоботига кўра, 2020 йилги пахта мавсуми давомида Фарғона вилоятида мажбурий меҳнатга жалб қилиш бўйича фақат битта ҳолат қайд этилган.