“Namangandan shu vaqtgacha biror marta ‘gard’ chiqmagan edi”. Tanzila Norboyeva – Namangan majburiy mehnat sabab butun dunyoga “mashhur” bo‘lgani haqida

Namangan viloyatida majburiy mehnatga qarshi 2013-yildan beri o‘tkazilgan monitoringlarda biror marta “gard” ham chiqmagan edi, biroq 2020-yilgi paxta terimi mavsumida barcha sa’y-harakatlar yo‘qqa chiqdi. Bu haqda Senat raisi Tanzila Norboyeva Odam savdosiga va majburiy mehnatga qarshi kurashish Milliy komissiyasining 4-dekabr kuni bo‘lib o‘tgan yig‘ilishida aytib o‘tdi.

Ta’kidlanishicha, 2020-yilda paxta mavsumi bilan bog‘liq eng ko‘p majburiy mehnat holati Namangan viloyatida aniqlangan — respublika bo‘yicha qayd etilgan holatlarning 42,2 foizi ushbu hudud hisobiga to‘g‘ri keladi. Jumladan, Pop tumani hokimi majburiy mehnatga yo‘l qo‘ygani uchun jarimaga tortilgan, Chortoq va Uchqo‘rg‘on tumanlari hokimlariga esa Vazirlar Mahkamasi farmoyishi bilan hayfsan berilgan.

Yig‘ilishda so‘zga chiqqan Namangan hokimi Shavkat Abdurazzoqov viloyatda majburiy mehnatga qarshi tashkil qilingan ishlar yetarli bo‘lmaganini, “aholi va mahalla bilan ishlanmagani”ni tan olgan. “Viloyat kesimida monitoring o‘tkazganimizda, 28 nafar mansabdor shaxsga ma’muriy jarima jazosini qo‘llaganmiz. Bunday kamchiliklar takrorlanmasligi uchun bor kuchimiz bilan harakat qilamiz”, – deb qo‘shimcha qilgan hokim.

Komissiya raisi Tanzila Norboyevaning ta’kidlashicha, bunday holat Namangan tarixida 2013-yildan beri bo‘lmagan edi, deya xabar bermoqda “Daryo” muxbiri Bekjon Jo‘raqulov.

Namangan viloyatida tarixda bunday holat bo‘lmagan. Biz majburiy mehnatga qarshi 2013-yildan beri monitoring o‘tkazayotgan bo‘lsak, bir marta ham “gard” chiqmagan edi. Bu yil Namangan butun dunyoga “mashhur” bo‘ldi. Bunday holat boshqa qaytarilmasligiga ishonch bildiramiz.

Tanzila Norboyeva, Senat raisi

Qayd etish joiz, Odam savdosiga va majburiy mehnatga qarshi kurashish Milliy komissiyasining hisobotiga ko‘ra, 2020-yilgi paxta mavsumi davomida Farg‘ona viloyatida majburiy mehnatga jalb qilish bo‘yicha faqat bitta holat qayd etilgan.