Ди Каприо, Том Круз ва Сильвестер Сталлоне: Жароҳатланганига қарамай роль ижро қилишдан тўхтамаган актёрлар (фото)

Фильм ва сериалларда уруш ҳамда жанг саҳналарини дублёрлар ижро қилади ва қон ҳамда жароҳатларнинг ҳаммаси пардоз бўлади, деб ўйлаганлар фикри қуйидаги маълумотлардан кейин ўзгариши аниқ.

Том Круз

2018 йилда тақдимоти бўлиб ўтган «Уддалаб бўлмас топшириқ» фильмининг олтинчи қисмида актёр томдан бошқа бир томга сакраётганида оёғи билан деворнинг тепа қисмига урилган. Оғриқ кучли бўлишига қарамай, маҳоратли Том роль ижро қилишда давом этган.

Леонардо Ди Каприо

«Озод Жанго» (2012) фильмининг суратга олиш жараёнида актёр мушти билан стол устига урган. Шундан кейин сценарийга киритилмаган ҳолат юз берган: мушт зарбидан стакан синган ва унинг парчаси Леонинг қўлини кесиб юборган. Ди Каприо ҳам Том Круз сингари оғриққа қарамай, ушбу саҳнани охиригача ўйнаган. Аммо айнан шу саҳна фильмни янада яхши чиқишига сабаб бўлган.

Вигго Мортенсен

«Узуклар ҳукмдори» (2001) фильмининг биринчи қисмида Арагорн,  Леголас ва Гимлининг бошқа қаҳрамонларни ўлди деб ўйлайдиган эпизод бор. Сюжетга кўра, Мортенсеннинг қаҳрамони Арагорн ғазабланганидан шлемини ерга ташлайди. Ушбу саҳна бир неча марта суратга олинган, аммо режиссёрнинг кўнгли тўлмаган. Сўнгги уринишда Вигго шлемини куч билан ташлаганидан оёғини икки бармоғини шикастлаб олган. Ушбу ҳақиқий эмоциялар эса фильмдан ўрин олган.

Харрисон Форд

Актёр «Қочоқ» (1993) фильмида сюжетга кўра ўрмон орқали қочишига тўғри келган ва айнан шу вақтда оёғини қайириб олиб, пайи узилиб кетган. Шунга қарамасдан, шифохонага бориш ўрнига у ролини охиригача ижро қилган.

Диана Кругер

«Шарафсиз ваҳшийлар» (2009) фильмида Кристофер Валц ижро қилган офицер, Диана Кругер гавдалантирган қаҳрамон Брижитни қарши томонга ишлашини билиб қолганидан кейин уни бўғиши акс этган саҳна бор. Аслида эса ишонарли чиқиши учун актрисани фильм режиссёри Квентин Тарантинонинг ўзи бўғган. Шу сабаб ҳам Диананинг эмоциялари ҳақиқий чиққан.

Сильвестер Сталлоне

«Рокки-4» (1985) фильмида Сильвестер, Дольф Лундгрендан уни рингда кучлироқ уришини сўраган. Дольф рози бўлган ва уч марта қаттиқ урган. Шундан кейин Сталлоненинг нафаси қисиб, кўкрак соҳасида оғриқ пайдо бўлган. У саҳнани ижро қилиб бўлганидан кейингина шифохонага борган. Лундгрен шунчалик зарб билан урганидан унинг юраги жароҳатланган бўлган.

Мартин Шин

«Апокалипсис бугун» (1979) фильмида маст ҳолдаги қаҳрамоннинг меҳмонхона ичидаги саҳнаси бор. Суратга олиш жараёнида Мартин ролга берилиб кетганидан ойнани уриб, қўлини кесиб олган. Кейин эса хона бўйлаб, ҳамма ерни қон қилиб югуриб юрган. Ушбу саҳна фильмдан ҳам ўрин олган.