Олий Мажлис Сенати раисининг биринчи ўринбосари Содиқ Сафоев «Ўзбекистон Республикасининг Конституцияси ва қонунчилигида сўз ҳамда матбуот эркинлиги ва Ўзбекистонда ОАВни ривожлантириш жараёнлари» мавзусидаги давра суҳбатида сўнгги тўрт йил ичида Ўзбекистондаги сўз эркинлиги, ОАВнинг тутган ўрни кескин равишда ўзгаргани ҳақида гапирди.
Содиқ Сафоев илгари Сенат ялпи мажлисларига кириш учун аккредитация қилиш қандай машаққат бўлганини, ҳозир Сенат мажлислари нафақат онлайн, балки интерактив тарзда ўтаётгани, Сенат мажлисида берилган саволлар, кўтарилган масалаларни шу заҳоти, шу жойнинг ўзида ҳал қилишга интилиш борлигини алоҳида таъкидлаб ўтган.
«Сўзсиз, ҳеч қандай шак-шубҳасиз, ОАВ бугунги кунда халқ овози, тўртинчи ҳокимиятга айланиб бормоқда. Ҳали балки катта кўп чўққиларга етганимиз йўқ, лекин биринчи силжишларни инкор қилиш мумкин эмас. Бу, албатта, муҳим», — дейди Содиқ Сафоев.
У сўз ва матбуот эркинлигисиз демократияга эришиб бўлмаслигини қайд этган.
БМТ Инсон ҳуқуқлари бўйича комиссиясининг эътирофи бўйича сўз эркинлиги — бу инсон ривожланишининг ажралмас бир омилидир. Биз мана шуни билишимиз керак. Агар бугун биз ренессанс ҳақида гапираётган бўлсак, инсоннинг манфаатлари ҳақида гапирмоқчи бўлсак, бунга демократиясиз, сўз ва матбуот эркинлигисиз эришиб бўлмайди. Сўз эркинлиги, матбуот эркинлиги — демократиянинг қон айланиш тизимидир.Аввалроқ «Gazeta.uz», «Daryo.uz», «Podrobno.uz» коронавирус статистикасига шубҳа билдиргани ва ўз материалларини расмий идоралар билан боғланиб, аниқлик киритмагани сабаб, «Kun.uz» эса ижтимоий тармоқ фойдаланувчиларининг газ ва электр таъминоти муаммосига оид изоҳларини эълон қилгани учун огоҳлантириш олгани тўғрисида хабар берилганди. АОКАнинг маълум қилишича, нашр қонунчилик талабларига мос келмайдиган ахборотни тарқатган.Ҳукумат фаолияти ҳақида аҳолини хабардор қилиш, айни вақтда ҳукуматга халқ фикри, умидлари, балки норозиликларини етказиш, ҳокимият шаффофлигини таъминлаш, давлат бошқаруви тизимини такомиллаштириш жамият барқарор ривожланишининг омилидир. Ҳеч қандай шак-шубҳасиз, буни ҳаммамиз тан оламиз, сўз ва матбуот эркинлиги замонамиз талабидир.
Агар ўз вақтида Президентимиз Шавкат Миромонович томонидан мана шу ислоҳотлар бошланмаганида, агар жамиятимизда сўз, матбуот эркинлиги жорий этилмаганида пандемия шароитида бизнинг аҳволимиз анча мураккаб бўларди. Биз ОАВ, шу жумладан, электрон манбалар ва блогерларга аҳолининг манфаатларини, пандемия давридаги муаммоларини кескин равишда кўтарганлиги учун, уни ҳокимият олдида дадил қўйганлари учун ҳам марказда, ҳам жойларда чексиз миннатдор бўлишимиз керак. Бугун шу сўзни айтишни бурчим деб биламан.
Биринчи навбатда шуни тушунишимиз керакки, ҳукумат, парламент, фуқаролик жамияти сўз ва матбуот эркинлигини таъминлаш, ОАВ ҳуқуқ ва имтиёзларини кафолатлашни ўзининг асосий бурчи ва вазифаси деб билиши керак. Бунинг учун энг муҳими, давлат раҳбарининг сиёсий иродаси бор. Бошидан Президентимиз бизнинг бугунги сиёсатимизни амалга оширишда ОАВ ва уларнинг янги шаклларини, блогерлар ҳақида ниҳоятда муҳим фикрларни илгари сурганлар.
Содиқ Сафоев, Олий Мажлис Сенати раисининг биринчи ўринбосари
Шундан сўнг БМТнинг Ўзбекистондаги доимий координатори Хелена Фрэйзер ва қатор хорижий давлатларнинг Тошкентдаги элчиларида мамлакатдаги мустақил онлайн-ОАВга Президент Администрацияси ҳузуридаги Ахборот ва оммавий коммуникациялар агентлигига келган огоҳлантириш хатларига муносабат билдириб, агентликнинг бу каби хатти-ҳаракатини танқид қилганди.
Изоҳ (0)