Сурхондарё вилоятининг Шеробод туманига янги ҳоким тайинланди. Бу ҳақда «Дарё»га вилоят ҳокимлиги ахборот хизмати раҳбари Заҳириддин Тўраев маълум қилди.
Таъкидланишича, 3 декабрь, пайшанба куни вилоят раҳбари Тўра Боболов иштирокида Халқ депутатлари Шеробод тумани кенгашининг навбатдан ташқари сессияси бўлиб ўтган. Унда туман ҳокими Алишер Амиров бошқа ишга ўтганлиги муносабати билан лавозимидан озод қилинган. Мазкур туманга айни кунга қадар Жарқўрғон тумани ҳокими лавозимида фаолият юритиб келаётган Зиёдулла Давлатов ҳоким этиб тасдиқланган.
Зиёдулла Давлатов 1974 йил 3 мартда Термиз туманида туғилган бўлиб, 2006 йилда Тошкент давлат иқтисодиёт университетини, 2007 йилда Ўзбекистон Республикаси Президенти ҳузуридаги Давлат бошқаруви академиясини тамомлаган.
2007—2010 йилларда АТ «Халқ банки» ички аудит бошқармаси бошлиғи, кредит департаменти директори, 2010—2013 йилларда «Халқ банки» Тошкент вилояти филиали бошлиғи, 2013—2017 йилларда Сурхондарё вилояти ҳокимининг иқтисодиёт ва ижтимоий ривожлантириш масалалари бўйича ўринбосари, 2017 йилдан шу кунга қадар Жарқўрғон тумани ҳокими лавозимида ишлаган.
Изоҳ (0)