Республика махсус комиссияси қарорига кўра, коронавирусга қарши курашишда аҳолига қулайлик яратиш мақсадида очилган «Атлас», «Ёшлик» марказлари вақтинчалик ёпилди. Касаллик динамикаси ошганда ёпилган объектлар қайта тезкор равишда очилади. Бу ҳақда АОКА ҳузурида ўтган брифингда Коронавирусга қарши курашиш штаби аъзоси Севара Убайдуллаева маълум қилди.

Фото: Тошкент шаҳар ҳокимлиги матбуот хизмати

Маълум қилинишича, тақсимлаш марказларининг ёпилиш сабабларидан бири коронавирусга чалинган беморлар сони камайгани билан боғлиқ.

«Тошкент шаҳрида тақсимлаш марказларининг ёпилиши, пойтахтда, умуман мамлакатда эпидемиологик вазият барқарорлашганини англатади.

Тўғри, кўплаб мамлакатларда коронавирус кенг тарқалмоқда, кўплаб давлатлар иккинчи тўлқиндан азият чекмоқда. Бу бизни ҳушёрликка чақириши лозим. Шунга кўра, бугунги кунда давлат ва барча манфаатдор вазирлик, идоралар эпидемиологик вазиятни назорат қилиш бўйича ишлар олиб боришмоқда ва касаллик динамикаси ошганда ёпилган объектлар қайта тезкор равишда очилади.

Бундан ташқари, мамлакат шифокорлари ва олимлари пандемия даврида коронавирусга чалинган беморларни самарали даволаш бўйича катта тажриба орттиришди, шунингдек, касбий маҳоратларини ҳам оширди.

Шунингдек, коронавирус беморларини даволашга ихтисослашган барча мавжуд марказлар зарур ётоқ-ўринлари, тиббиёт ускуналари ва дори воситалари билан таъминланган, шунингдек, малакали тиббиёт ходимлари ҳам бириктирилган. Марказлар ёпилган тақдирда ҳам ушбу таъминотлар сақлаб қолинади. Такрорий тўлқинда ушбу марказлар ва ресурслар аҳолига қайта юқори малакали ёрдам кўрсатиш учун тикланади», — дейди мутахассис.

Аввалроқ Самарқанднинг Каттақўрғон шаҳри ва Ургут туманидаги COVID-марказлар ҳам ёпилгани ҳақида хабар берилганди.

Эслатиб ўтамиз, Президент Шавкат Мирзиёев раислигида 17 ноябрь куни бўлиб ўтган видеоселекторда Ўзбекистон бўйича 89 та муассасада 17 500 та ўрин COVID-19 билан касалланганлар учун ажратилгани ҳамда ушбу ўринларда 6570 нафар бемор даволанаётгани ва койкалар бандлиги республика бўйича эса 38 фоизни ташкил этиши маълум қилинганди. Шу муносабат билан, мутасаддиларга коронавирусга ихтисослашган шифохоналар фаолиятини чуқур ўрганиб, уларни оптимизация қилиш топшириғи берилганди.

Тошкент шаҳар Учтепа туманида жойлашган «Атлас» савдо мажмуаси биносида 1000 ўринга мўлжалланган коронавирусга чалинган ва гумон қилинган беморларни қабул қилиш ва тақсимлаш маркази сентябрь ойининг охирида ишга туширилганди.

Тошкент шаҳар Шайхонтоҳур туманидаги «Ёшлик» спорт мажмуаси июль ойининг охирида коронавирус ташхиси қўйилган беморларни даволаш учун 520 ўринли махсус марказга айлантирилганди.