Сурхондарёда 52 минг тонна пахта қўшиб ёзилган бўлиши мумкин — бу вилоят режасининг 21,3 фоизига тенг

Сурхондарё вилоятида пахта топшириш режасига 21,3 фоиз пахта қўшиб ёзилган бўлиши мумкин. Бу ҳақда «Kun.uz» вилоят прокуратурасининг 2020 йил 30 октябрь санасидаги № 11/1.1-20 сонли топшириғига таяниб, хабар берди.

Қишлоқ хўжалиги вазирлиги ҳисоботига кўра, Сурхондарё вилоятида пахта хом ашёсини топшириш бўйича режа 82,3 фоизга бажарилган.

Вилоят прокурори ўринбосарларидан бири имзолаган ушбу топшириқда «Таҳлиллар, [Сурхондарё] вилоят бўйича жами 52 121 тонна пахта хом ашёсини қўшиб ёзиш ҳолатларига йўл қўйилганлигини кўрсатмоқда», дея таъкидланади.

Сурхондарё вилоятида 2020 йилда пахта хом ашёсини тайёрлаш бўйича шартномавий режа 244 минг 800 тонна қилиб белгиланган эди. Қўшиб ёзилгани тахмин қилинаётган 51 121 тонна вилоят йиллик пахта топшириш режасининг 21,3 фоизини ташкил этади.

Топшириқ матнида вилоят туманларида қанчадан пахта қўшиб ёзилганига ҳам аниқлик киритилган. Жумладан:

• Қумқўрғон туманида — 10 538 тонна;
• Ангор туманида — 9 488 тонна;
• Жарқўрғон туманида — 9 183 тонна;
• Музработ туманида — 8 526 тонна;
• Денов туманида — 6 111 тонна;
• Олтинсой туманида — 1 470 тонна;
• Шўрчи туманида — 1 716 тонна;
• Қизириқ туманида — 1 477 тонна;
• Термиз туманида — 1 470 тонна;
• Сариосиё туманида — 540 тонна;
• Узун туманида — 539 тонна;
• Шеробод туманида — 508 тонна;
• Бандихон туманида — 307 тонна пахта хом ашёсини қўшиб ёзиш ҳолатларига йўл қўйилган.

Шунингдек, вилоятдаги 535 та фермер хўжаликлари пахта хом ашёси тайёрлаш ва топшириш режасини 50 фоизга ҳам бажармагани аён бўлмоқда. Шеробод туманида — 205 та, Қизириқ туманида — 166 та, Шўрчи туманида — 50 та, Бандихон туманида — 37 та, Узун туманида — 29 та, Денов туманида — 19 та, Ангор туманида — 13 та, Жарқўрғон туманида — 10 та, Музработ ва Олтинсой туманларида 3 тадан фермер хўжаликлари амалда режани 50 фоизга ҳам уддалай олмаган.

Пахтачилик кластерлари ҳисобланадиган «Шошмохкашоб» МЧЖ, «Termiz Jayxun Cluster» МЧЖ, «Термиз Жайхун Cлустер» МЧЖ, «Surxon sifat Tekstil» МЧЖ, «Indenim Кластер» МЧЖ, «Ангор Сурхон Ғурури» МЧЖ, «Muzrabat Indenim klaster» МЧЖ, «Bandixon Agroxizmat» МЧЖ кабиларнинг ҳисоботларида аслида терилмаган пахта хом ашёсини қўшиб ёзишгани ҳам маълум бўлмоқда.

«Энг ажабланарлиси, ёғингарчилик кунлари ҳам Сурхондарёнинг пахта ‘хирмон’ларига хом ашё кирим қилинган», — дейилади хабарда.

Сурхондарёдаги туман прокурорларига йўлланган топшириқда қайд этилган қонунбузилиш ҳолатлари юзасидан зудлик билан прокурор назорати ҳужжатларини қўллаб, амалга оширилган ишлар ва кўрилган чоралар ҳақида вилоят прокуратурасига 5 ноябрга қадар ахборот бериш сўралган.

Қишлоқ хўжалиги вазирлиги Ўзбекистонда 2020 йилда қанча пахта ҳосили йиғиб олингани тўғрисида берган маълумотига кўра, Сурхондарё вилояти энг ёмон натижани қайд этган. Бундан ташқари, Бухоро, Сирдарё ва Қашқадарё вилоятларида ҳам пахта режаси бажарилмаган.