Энергетика вазири Алишер Султонов Alter Ego лойиҳасига берган интервьюсида бутун мамлакат бўйлаб электрон газ ҳисоблагичларни ўрнатиш бўйича тендерда ғолибликни қўлга киритган «Технопарк» МЧЖ мавзусига ҳам тўхталиб ўтди.
Вазирнинг сўзларига кўра, бу борада очиқ тендер ўтказилган бўлиб, унда бир нечта компания иштирок этган. «Технопарк» компанияси унда ғолиб бўлган.
«Gazeta.uz»нинг Давлат хизматлари марказининг очиқ маълумотларига таяниб ёзишича, «Технопарк» компанияси 2018 йилнинг 10 июнида рўйхатдан ўтган. Фаолияти — электрмаиший қурилмаларни ишлаб чиқариш. Устав фонди 10,1 миллиард сўм бўлган компаниянинг ягона таъсисчиси Тошкент ҳокимлиги ҳисобланади. «Технопарк» раҳбари Сарвар Аҳадов. Корпоратив ахборот ягона порталига кўра, Аҳадов бунга қадар Artel кондиционерлари ишлаб чиқарилган Dream Production корхонасини бошқарган. Dream Production таъсисчиси эса Тошкент шаҳар ҳокими Жаҳонгир Ортиқхўжаев.
Интернетда ушбу ҳисоблагичларнинг ишдан чиқиши кенг муҳокамаларга сабаб бўлгани тўғрисидаги саволга вазир буларнинг барчаси ёмон ниятли одамлар томонидан уюштирилганини маълум қилган.
«Бу атайлаб амалга оширилган. Биз текширув ўтказдик ва буни аниқладик. Ушбу ‘оғайнилар’ биз билан қанчалик курашмасин, барибир ҳисоблагичларни ўрнатамиз ва одамларни истеъмол қилган нарсаси учун пул тўлашга мажбур қиламиз. Тартиб ўрнатамиз ва ўғриликларга барҳам берамиз», — дейди вазир.
Шунингдек, вазир табиий газнинг бутун республика миқёсида ўғирлаш ҳолатлари жуда кўп учраши, шу сабабли куз—қиш мавсумида оддий истеъмолчиларга унинг етиб бормаслигини таъкидлаган.
Мавзуга доир: Ўзбекистонда газ ҳисоблагичларни ўрнатиш ва таъмирлаш бепул амалга оширилиши белгиланди
Изоҳ (0)