Қозоғистон Ўзбекистондан помидор импорт қилишни вақтинча чеклаши мумкин
Тузатиш: Хабарнинг дастлабки таҳририда «Қозоғистонда ҳам Ўзбекистондан юборилган помидорларда вирус аниқланди» мазмунида сарлавҳа берилган эди. Бу нотўғри — Қозоғистон Ўзбекистондан импорт қилинган помидор ва бошқа сабзавотларда ҳозирча ToBRFV вирусини аниқламаган, фақат вазиятни кузатиб, текширув ишларини олиб боришни мақсад қилган. Хато ахборот берилгани учун «Дарё» таҳририяти муштарийлардан узр сўрайди.
Аввалроқ, 26 ноябрь куни Россия томони Фарғона вилоятида етиштирилган помидор ва булғор қалампирининг олиб кирилишига вақтинчалик чеклов жорий этган эди. «Росселхознадзор»нинг аниқлик киритишича, бунга маҳсулотларда ToBRFV (tomato brown rugose fruit virus) вируси топилгани сабаб бўлган.
«Помидорларда жигарранг буришган вируси топилгани сабабли 26 ноябрдан эътиборан Фарғона вилоятида етиштирилган помидор ва булғор қалампирларини Россияга олиб кириш тақиқланди. Ҳозирда биз Қозоғистон иссиқхона хўжаликлари учун юзага келиши мумкин бўлган эҳтимолий хавф ва таҳдидлар бўйича жорий вазият таҳлилини ўрганяпмиз, ўрганиш якунларига кўра тегишли қарор қабул қилинади», — дейилади Қозоғистон Қишлоқ хўжалиги вазирлиги ахборотида.Қайд этиш жоиз, Россия вақтинчалик тақиқни жорий этганини эълон қилгач, Ўзбекистон Инвестициялар ва ташқи савдо вазирлиги «Росселхознадзор» билан мазкур масала бўйича маслаҳатлашувлар ўтказаётганини маълум қилган эди. «Ўздавкарантин» ҳам вазиятни ўрганмоқда.
Таъкидланишича, ToBRFV ўсимликлар вирусининг янги штамми бўлгани учун Ўзбекистон ҳудудида илгари аниқланмаган. ЕОИИ мамлакатларида (Россия ва Қозоғистон ушбу иттифоқ аъзоси ҳисобланади) ҳам ушбу вирусга нисбатан тақиқ мавжуд эмас — Евросиё Иқтисодий комиссияси кенгашининг 2016 йил 30 ноябрдаги қарори билан тасдиқланган карантин объектлари ягона рўйхатига ToBRFV киритилмаган.
Маълумот учун, жигарранг буришган вируси (ToBRFV)нинг инсон ҳаётига таъсири ҳақида ҳозирча ҳеч нарса аниқланмаган, аммо у иссиқхона хўжаликларида 30 фоиздан 70 фоизгача ҳосилни йўқотишга олиб келиши мумкин. Помидор ва булғор қалампирини зарарловчи бу вирус биринчи марта 2014 йили Исроилда аниқланган, кейинчалик Мексика, Италия, Хитойда ҳам қайд этилган. 2019 йил июнида вирус Туркияда ҳам топилган эди.
