«У ўзини италиялик футбол билимдони деб ҳисоблайди, аслида эса кўп нарсани тушунмайди». Шомуродовнинг агенти Элдорни танқид қилган ҳамкасбига жавоб қайтарди

«Женоа» ҳужумчиси Элдор Шомуродовнинг агенти Қаҳҳор Мўминов ўзбекистонлик футболчи борасида танқидий фикрларга ўз муносабатини билдирди.

Аввалроқ италиялик футбол агенти Марко Трабукки «Женоа» 25 ёшли футболчини сотиб олиб, катта хатога йўл қўйгани ҳақида гапирганди.

«Марко, балки, ёмон менежер эмасдир, бироқ футбол кам кўради ва бу борада тушунчаси паст. У ўзини италиялик футбол билимдони санайди. Клубдан бўшатилган собиқ директор билан суҳбат қуради ва бу бўлмағур фикрлари айтади.

Элдорнинг мослашув жараёнида ўсиш бор, афсуски, у уч ҳафта жароҳат сабаб майдонга туша олмади. Ўтган куни Генуя дербисида асосий таркибда тушди, яхши ўйнади, Скамакканинг голига ассистентлик қилди. Умуман олганда ишлар режа бўйича кетмоқда.

Роман Ерёменко — ажойиб футболчи ва Элдорга «Ростов»да катта ёрдам берган. Бироқ у Шомуродовга бор-йўғи икки бор голли узатма берган, холос», — дейди Мўминов.

Роман Ерёменко Трабуккининг мижози ҳисобланади. Аввалроқ у Элдор ҳақидаги иқтибосида шундан деганди: «Шомуродовга жуда кўп ҳужум қиладиган клуб керак. Роман Ерёменко каби ажойиб узатмалар қилиб берадиган шерик зарур».

Маълумот учун, Трабукки Италияда туғилган бўлса-да, унинг келиб чиқиши Қозоғистондан ва унинг онаси россиялик.

Шомуродов А Серия жорий мавсумида учта ўйин ўтказиб бирорта ҳам самарали ҳаракат амалга ошира олмади. Италия Кубоги 1/16 финали доирасида ўтган «Сампдория«га қарши ўйинда (3:1) Элдор голли узатмага муаллифлик қилди.