«Барселона» раҳбарияти жамоа футболчилари ва мураббийлари билан маошларни қисқартириш борасида келишувга эришди. Бу ҳақда каталон клуби матбуот хизмати маълум қилди.
Бу «кўк-анорранглилар»га 2020/21 йилги мавсумда 122 миллион еврони тежаб қолиш имкониятини беради. Шунингдек, футболчилар жорий мавсум учун ваъда қилинган бонусларнинг кечиктириб берилишига рози бўлган, бу миқдор 50 миллион евро атрофида баҳоланмоқда. Бонус пуллари уч йил давомида тўлаб берилади.
Таъкидланишича, яқин орада футболчи ва мураббийлар билан мазкур келишув тасдиқланади.
«Барселона» коронавирус пандемияси сабаб молиявий қийинчиликларга учрамоқда. Клуб март ойида ҳам футболчиларнинг маошини қисқартирганди. Сентябрь ойида эса клубнинг бир қатор футболчилар маошини камайишига рози бўлган ҳолда шартномани узайтирганди.
Аввалроқ «Барселона» футболчилари маошларнинг яна бир бор қисқартирилишига қарши экани хабар қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)