Futbol bo‘yicha Italiya Kubogining 1/16-finalida “Jenoa” 26-noyabr, payshanba kuni “Sampdoriya” maydonida mehmon bo‘ldi.
Uchrashuvning birinchi bo‘limi to‘liq mezbonlar ustunligida o‘tdi. 18-daqiqada Valerio Verre o‘zining super zarbasi bilan darvozaning to‘qqizlik burchagini aniq nishonga oldi. Tanaffusga qadar maydon egalari yana bir qator imkoniyatlarga ega bo‘ldi, biroq hisob birinchi bo‘limda boshqa o‘zgarmadi.
Tanaffus vaqtida “Jenoa” ustozi Rolando Maran maydon markazida ikkita o‘zgarish qildi va mehmonlar vaziyatni o‘nglashga muvaffaq bo‘ldi. Asta-sekin ustunlik “Jenoa” tomoniga o‘tdi. 60-daqiqada Eldor Shomurodov chap qanotdan tezlik olib yarim maydonni bosib o‘tdi va jarima maydoniga yorib kirib, yaxshiroq imkoniyatda turgan sherigiga to‘pni uzatdi. Janluka Skamakka esa deyarli bo‘sh qolgan darvozani qiyinchiliksiz ishg‘ol qildi.
68-daqiqada zaxiradan maydonga qo‘shilganiga sanoqli daqiqalar bo‘lgan Lukas Lerager mehmonlarning ikkinchi golini urgan bo‘lsa, oradan to‘rt daqiqa o‘tib, Skamakka yakuniy hisobni o‘rnatdi — 1:3.
Gollar videosini bu yerda tomosha qilish mumkin — gollar
Shu tariqa “Jenoa” musobaqaning nimchorak finaliga yo‘l oldi va u yerda “Yuventus”ga qarshi bahs olib boradi.
Uchrashuvda Eldor Shomurodov asosiy tarkibda maydonga tushib, 85-daqiqada zaxiraga olindi.
Italiya Kubogi
1/16 final bosqichi
26-noyabr, payshanba
“Sampdoriya” — “Jenoa” 1:3
Gollar: 1:0 – 18 Verre, 1:1 – 60 Skamakka, 1:2 – 68 Lerager, 1:3 – 72 Skamakka.“Sampdoriya”: Audero, Tonelli (Kandreva, 87), Audjello, Bereshinski, Yoshida, Adriyen Silva (Ekdal, 78), Torsbyu, Yankto, Verre, la Gumina (Gabbyadini, 87), Leris (Damsgor, 77).
“Jenoa”: Marketti, Bani (Masello, 79), Gilone, Goldaniga, Pellegrini, Rovella (Melegoni, 46), Sturaro (Lerager, 65), Zays (Badel, 46), Sapata, Shomurodov (Pyatsa, 85), Skamakka.
Ogohlantirishlar: Sapata (13), Adriyen Silva (26), Yoshida (27), Sturaro (43), Leris (62), Pellegrini (69), Gilone (75).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)