Ўзбекистон халқ таълими вазири Шерзод Шерматов 2020/2021-ўқув йилида ўқувчилари олий таълим муассасаларига ўқишга кирмаган мактаблар сони 2019 йилга нисбатан уч баробарга камайганини маълум қилди.
Шерзод Шерматовнинг маълумот беришича, ўқишга ҳужжат топширган 1,5 миллион абитуриентнинг атиги 23 фоизи 2020 йилдаги мактаб битирувчилари бўлган бўлса, улар давлат гранти квотасининг 50 фоизини эгаллади. «Қолган 77 фоиз абитуриентни ташкил этган лицей, коллеж битирувчилари ёки аввалги йилги битирувчилар ҳам ОТМга ҳаракат қилган, репетиторга борган, лекин уларнинг умумий натижаси мактаб битирувчилариникидан анчагина орқада бўлди», - деди вазир.
Вазирлик раҳбарининг билдиришича, олий таълимга бирорта ҳам ўқувчиси кирмаган мактаблар сони 3 баробарга камайди, яъни 2019-йида уларнинг сони 2126 та эди, 2020 йилда эса 692 тага тушди. «Бунга ҳам ўтган йилдан бундай мактаб раҳбарларини лавозимига лойиқлигини жиддий кўриб чиқиш бошлангани катта туртки бўлди», — деб таъкидлаган Шерзод Шерматов.
«Энди буёғига директорларимиз ва мактаб жамоаси фақат натижага ҳаракат қилиши керак. Натижа — бу битирувчиларнинг ҳаётда муваффақиятга эришиши. Уларнинг бир қисми ўқишнинг кейинги босқичига ўтса, кейинги қисми ўз ишини топиб кетишидир. Ўқишга ҳам кира олмаса, иш ҳам топа олмаса, кейинчалик ёшларимиз ҳаётда қийналиб қолишади. Шу сабабли мактаб давридаги вақтини айнан шу натижага йўналтириши, шу жумладан, ота-оналар билан ҳамкорликни кучайтириши керак», — деб ёзган вазир.
Халқ таълими вазирининг таъкидлашича, Хоразм, Навоий, Сирдарё ва Қашқадарё вилоятларидаги яхши кўрсаткичга эга ва умуман натижа кўрсатмаган мактабларни солиштирганда, асосий фарқ айнан директор ва мактаб жамоасининг ўз касбига бўлган фидойилиги туфайли юзага келаётгани маълум бўлган.
«Солиштирганда кўринадики, аксарият ёмон кўрсаткичга эга мактабларнинг моддий техник ҳолати яхши кўрсаткичга эга бўлган мактабникидан анча яхши бўлиб чиқаяпти. Эскичасига фақат мактабнинг ташқи кўринишига қараб директорга баҳо берилганида, аксинча булар яхши бўлиб чиқарди ва яхши натижа кўрсатган директорга эса мактабининг кўриниши яхши бўлмагани сабабли чора кўрилиши мумкин эди», — дея қўшимча қилган вазир.
Мавзуга доир:
- Халқ таълими вазири: «Кейинги кириш имтиҳонларида ўзбек тили бўйича грамматика эмас, тўртта кўникма тест қилинади»
- Шерзод Шерматов бошчилигидаги йиғилишда бирорта битирувчиси ОТМга кирмаган Қашқадарёдаги 20 та мактаб директори ишдан олинди
- Битирувчиларнинг ОТМга кириш кўрсаткичлари бўйича энг катта ўсиш қайси вилоятда қайд этилгани маълум қилинди
Изоҳ (0)