Американинг жамоатчилик фикрини ўрганувчи Gallup институти 2020 йил учун энг ижобий фикрловчи аҳолига эга мамлакатлар рейтинги — Global Emotions Report’ни эълон қилди.
Институт 2019 йилда одамларнинг яхши дам олгани, ҳаёти қизиқарли кечаётгани, жилмайгани ёки кулгани, ўзига ҳурмат билан муносабатда бўлишаётгани ёки бўлмаса кучли стресс, ғазаб, ташвишни бошдан ўтказаётганини аниқлаш мақсадида суҳбат шаклида сўровнома ўтказган. Унда 140 дан ортиқ мамлакатдан 175 мингдан ортиқ киши иштирок этган.
Тадқиқотчиларнинг айтишича, дунё миқёсида одамларнинг ўзини қандай ҳис қилаётгани катта куч бўлиб, у миллат тақдирини акс эттиради. Ҳар йили эълон қилинувчи Global Emotions Report Gallup’нинг навбатдаги рейтингида одамлар COVID-19 пандемияси даврида ўзини қандай ҳис қилганини кўриш мумкин.
Харитада давлатлар ранги қанчалик тўқ яшилга мойилроқ бўлса, одамлар кайфияти ижобий эканлигини билдиради. Аксинча, харитадаги ранглар яшилдан оққа қараб ўзгариши аҳоли кайфиятида ижобий таассуротлар камлигини англатади.
Афғонистон, Ливан, Литва, Туркия, Непал, Тунис, Эфиопия, Шимолий Кипр ҳудуди, Бангладеш, Яман, Сербия ва Миср каби давлатлар аҳолиси ижобий таассуротлар бўйича энг қуйи ўнликда жойлашган.
Панама, Сальвадор, Гватемала, Парагвай, Колумбия, Индонезия, Мексика, Никарагуа, Хитой, Коста-Рика, Дания ва Гондурас аҳолиси эса ижобий таассурот индексининг Топ-10 талигида жойлашган. Бундан ташқари, харитада Канада, АҚШ, Ўзбекистон, Саудия Арабистони, Янги Зеландия ва Жанубий Африка Республикаси ҳам бир мунча тўқроқ рангда кўрсатилган.
Лотин Америкаси давлатлари ушбу рейтингда 2017, 2018, 2019 йилда ҳам етакчилик қилган.
Марказий Осиёдаги Ўзбекистонга қўшни давлатларда, Афғонистондан ташқари, Ўзбекистонга нисбатан бир мунча пастроқ натижалар қайд этилган.
Gallup ҳисоботда барча давлатлар рейтингини эълон қилмаган, фақатгина энг юқоридаги 10 та ва энг пастдаги 10 давлат номларини санаб ўтган. Бундан ташқари, ушбу ҳисобот ҳеч қандай расмий мақомга эга эмас ва бутун аҳолининг кайфиятини ифода этмаслиги мумкин.
Аввалроқ Ўзбекистон World Happiness Report 2020 рейтингида 153 та мамлакат орасида 38-ўринни эгаллаб, 2019 йилги кўрсаткичлардан уч поғона юқорилагани, Legatum жаҳон мамлакатлари фаровонлик рейтингида 100 таликдан ўрин олгани маълум қилинган эди.
Изоҳ (0)