Халқ таълими вазири Шерзод Шерматов Қашқадарё вилоят халқ таълими бошқармасига янги раҳбар тайинлаб, унга ишни бошқармани тозалашдан бошлаш кераклигини билдирган, дея хабар берди «Дарё» мухбири.
Маълум бўлишича, халқ таълими вазири иштирокидаги йиғилишда вазир вилоят халқ таълими бошқармасининг ходимлар билан ишловчи масъулини сўраган. Йиғилишга келмаганини ва касал эди, деган гапни эшитгач, «Ҳа, у касал бўлади. Ва охири бошқа нарса билан тугайди — прокуратура билан», деган.
Вазир бошқарманинг янги раҳбари Тўлқин Каримовга ишини бошқарманинг ходимлар билан ишловчи масъулини ишдан олиш билан бошлаши кераклигини билдирган.
«Биринчи навбатда ‘отделкадр’ни ишдан олиш керак. Хуллас, аввало ‘облонo’нинг ўзини тозалаш керак. Кейин ўқувчиси ўқишга киролмаган 200 та мактабни ўрганиш керак. Мактабга директорлик қилаётганига энди бир ой бўлган бўлса, унга тегиш керак эмас. Лекин 10 йиллаб директор бўлиб, натижа кўрсатмаганларни олиш керак. Биз ўша куни 20 тасини ишдан олдик», — деди Шерзод Шерматов.
Халқ таълими вазирининг айтишича, у ўқувчилари ОТМга киролмаган 20 нафар мактаб директорини ишдан олишдан аввал, уларга ўз хоҳиши билан ариза ёзишни таклиф қилган.
«10-15 йил мактабга раҳбарлик қилиб, ҳеч қандай натижага эришилмаганини ҳис қиляпсизларми деб сўраганимизда, ҳеч қайси директор ҳеч нарса демади. Ҳатто масъулиятни ҳис қилмаяпти», — деди вазир.
Вазир Шерзод Шерматов Тўлқин Каримовга ишлаётган, яхши натижа кўрсатаётган мактабларни текшириш анъанасини тўхтатиб, ишламаётган, натижа кўрсатмаётган мактабларни текшириш ишларини авж олдириш кераклигини тайинлаган.
«Ишлаётган, яхши мактабга халақит қилишимиз керак эмас, биз ҳар куни, ўша ‘облонo’ ва ‘рaйоно’нинг ходими ҳам ҳар куни энг ёмон мактабга боришимиз керак. Энг ёмони ҳам ўзи секин-секин кўтарилиб бораверади. Ёмонни яхши қилсак бўлди, яхшини ёмон қилиб беришимиз керак эмас», — деган вазир.
Эслатиб ўтамиз, Шерзод Шерматов иштирокидаги йиғилишда Қашқадарё вилоят халқ таълими бошқармасига айни кунга қадар Шаҳрисабз шаҳрини бошқариб келган Тўлқин Каримов тайинлангани ҳақида хабар берилганди. Собиқ бошлиқ эса қуруқ ва баландпарвоз гаплар гапириб, давлат раҳбарининг кўнглини хира қилгани учун ишдан олингани маълум бўлди.
Изоҳ (0)