O‘zbekiston prezidentining “Mamlakatimiz ta’lim-tarbiya tizimini yanada takomillashtirish, ilm-fan sohasi rivojini jadallashtirishga oid qo‘shimcha chora-tadbirlar to‘g‘risida”gi farmoni loyihasi yuzasidan 24-oktabr kuni AOKAda matbuot anjumani o‘tkazildi. Unda Xalq ta’limi vaziri Sherzod Shermatov maktab o‘quvchilariga o‘zbek tili bo‘yicha faqat grammatika o‘qitilayotgani va bu borada kutilayotgan yangilik to‘g‘risida so‘z yuritdi, deya xabar bermoqda “Daryo” muxbiri.

Foto: “Daryo”

“O‘zbek tilini o‘qitishda bizdaб asosan, grammatikaga e’tibor berilgan. Biz hozirda buni umuman yangicha yo‘nalishda amalga oshiryapmiz. Aslida, til o‘rganish to‘rtta ko‘nikmaga bog‘liq. Ingliz tiliga agar TOEFL topshirsangiz, to‘rtta ko‘nikma o‘rganiladi, ular grammatikani ko‘rmaydi. Shuning uchun Respublika ta’lim markaziga ham bu vazifa qo‘yilgan. Ya’ni grammatikadan qochib, to‘rtta ko‘nikma – o‘zbek tilida o‘qib, tushunish, eshitib tushunish, ifodali gapirish va yozish. Afsuski, mana shu to‘rtta ko‘nikma chetda qolib, bolalarimizga faqat grammatika o‘qitilyapti.

Oddiy bir misol. Oldingi yili Sirdaryoda o‘qituvchilarning o‘zini ham test qilgandik. Aksariyat pedagoglarning o‘zi ham o‘zbek tili grammatikasi bo‘yicha DTM testlarini yecholgani yo‘q. Tasavvur qiling, bolalarni qiynab, grammatikaga tayyorlayapmiz. Shuning uchun bu bo‘yicha ham farmonda vazifa qo‘yilgan. Keyingi kirish imtihonlarida o‘zbek tili bo‘yicha test qilinganida ham grammatikani emas, to‘rtta ko‘nikma test qilinadi. Ingliz tilida IELTS’ga tayyorlangandek keyinchalik bolalarimiz ham to‘rtta ko‘nikmaga tayyorlanishga harakat qilsa, albatta, til bilish darajasi ham oshib boradi”, — dedi Shermatov.