Янги 2021 йилда қандай бичимдаги кўйлак урфга киради? (фото)

30 йилларда Клер Мак-Карделл сабаб мода оламида пайдо бўлган, 70 йилларда Диана фон Фюстенберг ёрдамида қайта урфга кирган запах бичимли либослар бугунги кунда ҳам долзарблигини йўқотмаган. Дизайнерлар мазкур бичимда либос тақдим қилишдан, мода ихлосмандлари эса уларни кийишдан чарчагани йўқ. Мазкур мавсумда мода олами етакчилари эски моделлар учун янгилик киритди. Қуйида улардан айримларининг суратлари билан бўлишамиз.

Запах бичимли либослар ёзда ҳам долзарб эди совуқ кунларда эса моделлар орасида хитлиги йўқолганича йўқ. Замонавий кўринишга эга, қулай бундай бичимли либослар қоматга янада чиройли урғу беради, мукаммал «қум соати»дек кўринишга эга бўлишга сабабчи бўлади. Бўйин қисмининг V кўринишида очиқ экани эса бўйни баланд кўрсатади.

Дизайнерлар фантазияларига эркинлик берди ва классик мато ўрнига бошқалардан фойдаланди. Масалан, Dolce & Gabbana намойишларида ипак матосидан Issey Miyake’да лён ва Saint Laurent’да бахмал ишлатилганини кўриш мумкин. Bottega Veneta ва Vince модалар уйи дизайнерлари эса трикотаж матодан тикилган вариантлар ҳам чакки эмаслигини исботлади.

Iro ва Ganni брендлари эса бу борада чарм матосидан фойдаланишни маъқул билган. Чармдан тикилган запах бичимли либос билан бир вақтнинг ўзида ҳам жиддий ҳам латофатли кўринишга эга бўлиш мумкин.

Қолаверса, дизайнерлар коллекцияларида бундай кийимни нима билан мослаш мумкин эканига ҳам урғу бериб кетган. Rag & Bone запахли либосни узун чарм этик билан кийилса, Tory Burch эса унча катта бўлмаган, занжир билан безатилган геометрик сумка билан тутилса қандай туришини кўрсатиб берган.

Issey Miyake ва Amiri брендлари эса уни 90 йиллар тренди яъни этаклари кенг шимлар билан, Bevza эса водолазка билан мослаш мумкинлигини кўрсатиб берган.

Сиз ҳам мода ихлосмандларидан ортда қолмайдиганлардан бўлсангиз, миди узунлигидаги қоматни чиройли кўрсатадиган ва шу билан бирга совуқда оёқларни иссиқ тутадиган моделларга диққатингизни қаратиш тавсия қилинади.

Образингиз қизиқарли бўлиши учун эса узун этик, пальто ва водолазка билан умумлаштиринг.