Нозик жинс вакиллари ҳар қандай ҳароратда ҳам ўзига хос услуб ва кўринишга эга бўлишни истайди. Лекин қишда ҳаммаси бошқачароқ, совуқ мавсумда дидли, шу билан бирга, қулайлик ва саломатлик билан боғлиқ муаммоларни юзага келтирмайдиган кийимларни кийиш керак. Бу эса трендда бўлишга халақит бермайди, шунчаки мавсумга хос тавсиялар ва мода ихлосмандларининг кийиниш борасидаги услубларидан илҳомланиш кифоя.
Этаги кенг устки кийим
Бундай бичимли шуба бувингиз ёки ойингиз замонасида долзарб бўлган бўлиши мумкин, лекин ҳозир эмас. Чунки кўриниши қўнғироқни эсга соладиган устки кийим қоматни чиройли кўрсатмайди. Аксинча семиз, ёшингизга нисбатан катта ва қомат пропорциясини хунук кўрсатади. Шу сабаб ҳам стилистлар бундай бичимли устки кийимни 2020 йилда кийишда мантиқ кўрмайди. Бунинг ўрнига оверсайз услубидаги эко-мўйнали моделларга эътибор қаратинг.
Мўйнали куртка
Ёқасида, чўнтак ва енгларида мўйнаси бор куртка кимгадир чиройли кўрингани билан, урфдан қолганини инкор этиб бўлмайди. Бундай вариантдаги курткаларни харид қилмаган яхши, қолаверса, капишонкадаги юпқа ва сифатсиз мўйна нафақат дидсиз кўринади, балки иссиқ тутмайди ҳам. Ёқа ва енгида мўйнаси бор пальто бўлса бошқа гап, чунки айнан 90 йилларга хос бўлган шундай моделлар совуқ мавсумда ҳар қачонгидан ҳам долзарброқ.
Узун норкали (қоракўзан мўйнасидан тикилган) шубалар
Бундай устки кийим ҳам ўтмишга хос башанглик белгиси. Агар гардеробингизда бундай шуба бўладиган бўлса, уни ташлаб юборишга шошилманг, балки кейинчалик 90 йиллардаги пальтолар сингари такрор урфга кирар, лекин ҳозирча уни киймаганингиз яхши. Чунки бундай шуба ўтмиш артефакти бўлиб кўринади.
Кўйлак бичимли пальто
Совуқда ҳам аёлларга хос латофатли кўринишни истагангиз-да, бундай моделларни кия кўрманг. Кўйлак бошқа, устки кийим бошқа, куртка ичидан пирпиракли либос кияверинг, лекин устингизга эмас. Бундай бичимни мода оламидаги энг бўлмағур экспериментлар сирасига киритиш мумкин. Биринчидан дидсиз кўрсатади, иккинчидан эса ноқулай ҳам. Унинг ичидан қалин жемпер ёки жакет кийиб бўлмайди. Ўрнига запахли пальто ёки оверсайз куртка танланг. Чунки сиз ва устки кийимингиз орасида ёпишиб турадиган кўйлак эмас, қишга хос қалинроқ кийим учун жой бўлиши ва кийганда ҳам тиқилиб қолгандек кўринмаслигингиз керак.
Енги калта устки кийим
Енги 3 га 4 ёки 7 га 8 бўлган шуба ва курткаларни ҳам кўйлак бичимли куртка сингари қулайлик ва услуб борасидаги ўхшамаган уриниш, деб атаса бўлади. Бундай устки кийим ичидан доим қалин енгли кийим ёки узун қўлқоп кийишга тўғри келади ва бу ноқулайлик келтириб чиқаради. Яхшиси, йўқ жойдан ўзингизга муаммо яратмасдан, енги узун ва иссиқ тутадиган устки кийим харид қилинг.
Изоҳ (0)