Қирғизистон ҳукумати қишлоқ хўжалиги маҳсулотларининг айрим турларини Евросиё иқтисодий иттифоқи божхона ҳудудидан ташқарига олиб чиқишга вақтинчалик тақиқ жорий этиш тўғрисидаги қарор қабул қилган. Бу ҳақда Ветеринария ва чорвачиликни ривожлантириш давлат қўмитасининг 23 ноябрь куни Марказий банкка юборган хатига таяниб, Telegram’даги «Банк ва мижоз» каналида маълум қилинди.
«Олинган маълумотларга кўра, Қирғизистон ҳукуматининг 2020 йил 19 ноябрдаги ‘Қирғизистон Республикасидан қишлоқ хўжалиги маҳсулотларининг айрим турларини Евросиё иқтисодий иттифоқи божхона ҳудудидан ташқарига олиб чиқишга (экспортга) вақтинчалик тақиқ жорий этиш тўғрисида’ги қарори қабул қилинган.
Қарорга мувофиқ, қишлоқ хўжалиги маҳсулотларининг айрим турларини, шу жумладан, тирик қорамоллар, қўй ва эчкиларни 6 ой муддат давомида экспорт қилишга вақтинчалик тақиқ жорий қилинган», — дейилади қўмита хатида.
«Юқоридагилардан келиб чиқиб ҳамда иқтисодий муаммолар ва кутилмаган зарарларнинг олдини олишда кўмаклашиш мақсадида Қирғизистондан қарор иловасида келтирилган чорвачилик товарларини, шу жумладан, қорамол, қўй ва эчкиларни олиб келиш бўйича Ўзбекистон хўжалик юритувчи субъектлари томонидан имзоланган импорт шартномаларга мувофиқ хорижий ҳамкорларга тўловларни амалга оширмаслик бўйича республикада фаолият юритаётган тижорат банкларига тегишли кўрсатмалар берилишини мақсадга мувофиқ деб ҳисоблаймиз», — дея қўмита тижорат банкларини огоҳлантирган.
Эслатиб ўтамиз, ноябрь ўрталарида Қирғизистон Ўзбекистон сабаб қорамол экспортини чеклаши мумкинлиги тўғрисида хабар берилганди. Бунга Қозоғистон томонидан ўрнатилган тақиқ боис Ўзбекистон ва Тожикистон томонлари қорамолларни оммавий равишда Қирғизистондан сотиб олишни бошлагани ва нархлар кўтарилиб кетгани сабаб қилиб кўрсатилган эди.
Аввалроқ Россия Фарғонадан помидор ва қалампир олиб киришга тақиқ қўйгани маълум бўлганди.
Изоҳ (0)