АОКА ҳузурида «Тошиссиққуввати» давлат унитар корхонаси директори ўринбосари Азиз Сайфуллаев иштирокида брифинг бўлиб ўтди. Унда куз–қиш мавсумида аҳолини иссиқлик энергияси билан таъминлаш бўйича юзага келаётган муаммолар, уларни бартараф этиш бўйича кўрилаётган тезкор чоралар ҳақида маълумот берилди.

Фото: Ахборот ва оммавий коммуникациялар агентлиги

«Аҳоли ҳамда ижтимоий соҳа объектлари учун қулай шарт-шароит яратишда иссиқлик ва иссиқ сув таъминоти бўйича узлуксиз ва сифатли хизмат кўрсатиш энг муҳим омиллардан бири саналади», — деди Азиз Сайфуллаев.

Қайд этилишича, «Тошиссиққуввати» томонидан пойтахтдаги 12 801 та бино-иншоотларга иссиқлик энергияси етказилмоқда, жумладан:

  • 9200 та кўп квартирали уйларга;
  • 524 та даволаш муассасаларига;
  • 498 та мактабларга;
  • 635 та болалар боғчасига;
  • 514 та олий ва ўрта махсус таълим муассасаларига;
  • 1430 та бошқа объектларга иссиқлик энергияси етказиб берилмоқда.

Таъкидланишича, ҳозирги вақтда барча иссиқлик тармоқларининг 72 фоизи (17 йилдан ортиқ) фойдаланиш муддатини ўтаб бўлган, яъни 1940 километр узатувчи қувурлар (970 километр канал) алмаштирилиши кўзда тутилмоқда.

Тошкент шаҳри иссиқлик таъминоти тизимини замонавий энерготежамкор технологиялар асосида ривожлантириш мақсадида Ўзбекистон президентининг 2019 йил 2 декабрдаги «Тошкент шаҳрининг иссиқлик таъминоти тизимини яна-да такомиллаштириш чора-тадбирлари тўғрисида»ги ПҚ-4542-сонли қарори имзоланган.

Қарор билан 2020–2022 йилларда Тошкент шаҳри иссиқлик таъминоти тизими самарадорлигининг асосий мақсадли индикаторлари тасдиқланиб, 2023 йилгача 358,5 километр қувурларни алмаштирилиши (қайта ётқизиш) кўзда тутилган. Бундан 2021 йилда — 157,3 километр қувурлар, 2022 йилда — 201,2 километр қувурлар алмаштирилади.

«Тошкентдаги қувурларнинг 72 фоизи авария ҳолатида»

«Kun.uz»нинг «Тошиссиққуввати» ходими Икром Исаковга таяниб маълум қилинишича, айни вақтда Тошкент шаҳридаги иссиқлик узатиш қувурларининг 70 фоиздан ортиғи – жами 1940 километр узунликдаги қувурлар авария ҳолатида. Мутасадди аҳолига иссиқлик етказиб берувчи қувурларни янгилаш масаласига тўхталган.

«Тошкент шаҳрида жами 2 900 километр қувур бор. Ундан 72 фоизи, яъни 1940 километрлик қисмининг муддати ўтган. Муддати ўтди деб 17 йилдан ортиқ вақт давомида ишлатилган қувурларга айтилади. Уларни алмаштириш лозим. Чунки бундан кейинги даврда авария хавфи катта бўлади.

Ҳурматли президентимиз шуни инобатга олиб 2019 йил 2 декабрда «Тошкент шаҳрининг иссиқлик таъминоти тизимини яна-да такомиллаштириш чора-тадбирлари тўғрисида»ги қарорини имзолаганди. Шу қарор асосида 2021–2022 йилларда Тошкент шаҳри бўйича 351 километр қувурни алмаштиришимиз керак.

Ҳозирда ишлаб турган 20, 30 йиллик қувурлар ҳам бор. Муддати ўтиб кетишига биринчи ва асосий сабаб – молиявий масала. Уларни алмаштиришга маблағ керак. Ташкилотимиз молиявий жиҳатдан ўзини-ўзи таъминлайди. Шу пайтгача маблағимиз миқдорига қараб қувурларни алмаштирганмиз. Давлат ҳам бир қисмини молиялаштирган, лекин бу жуда кам миқдорда бўлган.

Ҳозирда президент қарори билан давлатнинг молиявий қўллаб-қувватлаши натижасида 2022 йилгача қувурларни алмаштириш ишларини олиб боришни режалаштирганмиз. Келгуси икки йилда 351 километр қувурни янгисига алмаштириш жуда ҳам катта натижа бўлади. Бу 2021 йилда 150 километр, 2022 йилда 201 километр дегани», – дейди корхона вакили.

Маълум қилинишича, айни пайтда «Тошиссиққуввати» томонидан пойтахтдаги 12 минг 801 та бино ва иншоотларга иссиқлик энергияси етказиб берилмоқда.

Маълумот учун, Тошкентда иситиш мавсуми 15 октябрдан бошланган.