Сирдарё вилояти прокурори ўринбосари Навоий вилоятига прокурор бўлди. Бир кун аввал Навоий вилояти прокурори Сирдарёга прокурор бўлганди

Ўзбекистон бош прокурорининг буйруғига асосан адлия катта маслаҳатчиси Бахтиёр Аҳмедов Навоий вилояти прокурори лавозимига тайинланди. Бу ҳақда идора матбуот хизмати хабар берди.

Бахтиёр Аҳмедов 1976 йилда Сирдарё вилоятида туғилган. 1998 йилда Тошкент давлат юридик институтини ҳуқуқшунос мутахассислиги бўйича тамомлаган.

1998—2001 йилларда Янгиер шаҳар прокуратураси иш ўрганувчиси, ёрдамчиси, катта терговчиси, 2001—2002 йилларда Сирдарё вилояти прокуратураси ички ишлар идораларида Тергов ва суриштирув устидан назорат қилиш бўлими прокурори вазифасини бажарувчи, бўлим прокурори, 2002—2006 йилларда Сирдарё вилояти прокурорининг вояга етмаганлар ҳақидаги қонунлар ижроси устидан назорат бўйича катта ёрдамчиси сифатида ишлаган. 2006—2008 йилларда Прокуратура органларида терговни назорат қилиш бошқармаси таркибидаги ахборот таҳлил бўлими прокурори бўлиб фаолият кўрсатган. 2008—2017 йилларда Сирдарё вилояти прокуратурасида турли лавозимларда ишлаган. Аҳмедов 2017—2018 йилларда Бош прокуратура ҳузуридаги Мажбурий ижро бюроси Сирдарё вилояти бошқармаси бошлиғи, 2018—2019 йилларда Навоий вилояти прокурорининг ўринбосари, 2019 йилдан тайинловга қадар Сирдарё вилояти прокурорининг ўринбосари сифатида фаолият юритган.

Эслатиб ўтамиз, 10 ноябрь куни 2017 йилнинг июнидан бери Сирдарё вилояти прокурори лавозимида ишлаб келган Равшан Машарипов Самарқанд вилояти прокурори этиб тайинланганди. 25 ноябрь куни эса 2018 йилдан тайинловга қадар Навоий вилояти прокурори сифатида фаолият юритган Шоҳрух Аминов Сирдарё вилояти прокурори лавозимига тайинланган. Эндиликда Бахтиёр Аҳмедов айнан Аминовнинг ўрнида хизмат вазифасини олиб боради.

Аввалроқ МИБ директори Хоразм вилояти прокурори, Жаҳонгир Ҳотамов Наманган вилояти прокурори этиб тайинлангани тўғрисида хабар берилганди.