25 ноябрь куни адлия вазири Русланбек Давлетовнинг Facebook’даги «Халқ билан мулоқот / Диалог с народом» гуруҳида фуқаролар билан онлайн мулоқоти бўлиб ўтди. Мулоқот давомида адлия вазири автомашиналарни бошқаришда ишончнома ҳақидаги саволга жавоб берган.
«Автомашиналарни бошқаришда ишончнома масаласи доимо долзарб бўлиб келган. Президентимиз қарорига асосан яқин қариндошлар бўладиган бўлса, ишончнома зарур эмас деган норма киритилди, яъни яқин қариндошлар ўртасидаги муносабатлардан келиб чиқиб шу янгилик жорий этилди. Бу яхши қадам, енгиллик. Кўп вазирликлар бунга қарши бўлди, бироқ ҳукуматимиз қўллаб-қувватлади ва Президентимиз қарорни имзоладилар. Керак бўлса, бу жараённи соддалаштиришни яна давом эттиришимиз лозим. Чунки машинани бошқариш асосан суғурта асосида тартибга солинса ҳам, етарли бўлади. Ишончнома каби ҳужжатлар, ўйлаймизки, келажакда тарихга айланади», — дейди Давлетов.
Эслатиб ўтамиз,Ўзбекистонда 2019 йил 1 октябрдан яқин қариндошлар ўртасида нотариал тасдиқланган автоишончнома бекор қилинган. Қарор билан йўл ҳаракати қоидаларига киритилган ўзгартиришларга кўра, ДЙҲХХ органлари томонидан суғурта полисида кўрсатилган яқин қариндошлардан транспорт воситасини бошқариши ҳақида ишончнома ҳамда қариндошликни тасдиқловчи ҳужжатлар талаб қилинмайди.
Аввалроқ адлия вазири Русланбек Давлетов Тошкент шаҳрида 50 фоиз давлат хизматлари агентлиги ходимлари аттестациядан ўта олмаганини маълум қилганди.
Изоҳ (0)