Трамп маъмурияти Байденга ҳокимиятни топширишга тайёрлигини билдирди

АҚШ умумий хизматлар бошқармаси демократ Жо Байденнинг штабига ҳокимиятни топшириш жараёнини бошлашга тайёрлик ҳақида хабар берди, деб ёзади «РБК».

«Умумий хизматлар бошқармаси сайланган президент Жо Байденни маъмурият ҳокимиятни расман топшириш жараёнини бошлашга тайёрлиги ҳақида хабардор қилди», — дейилади CNN хабарида.

Бошқарма директори Эмили Мёрфи маълум қилишича, у қонунга ва мавжуд фактларга асосланган ҳолда бундай қарорга мустақил равишда келган. «Менга ижроия ҳукуматининг қандайдир мансабдор шахси томонидан ҳеч қачон бевосита ёки билвосита босим ўтказилгани йўқ», — дея қўшимча қилди Мёрфи, аммо у ўзига, оиласига ва бошқарма ходимларига номаълум шахслар таҳдид қилганини айтди.

Шунингдек, у АҚШ маъмуриятининг умумий масалалар бўйича бошқармаси Байденга мамлакатда ҳокимиятни топшириш жараёнини бошлаш учун зарур бўлган молиявий маблағлардан фойдаланиш имкониятини тақдим этган. Мёрфининг сўзларига кўра, Байденнинг штаби ҳозир тахминан 7,3 миллион доллардан фойдаланиши мумкин.

CNN телеканали қўлига келиб тушган ҳужжатда ҳокимиятни топшириш жараёни қачон бошланиши айтилмаган, шунингдек, бу албатта бошланиши ҳақида ҳам аниқ бир гап йўқ.

Амалдаги АҚШ президенти Дональд Трамп бу маълумотга изоҳ берар экан, Мёрфига ва ўз маъмурияти аъзоларига ҳокимиятни топшириш масаласида «зарур бўлган нарсаларни қилиш»ни тавсия этди. Аммо у сайловлардаги мағлубиятини тан олмасдан, бир қатор штатларда сайловлар натижалари юзасидан суд тортишувларини давом эттириш ниятини маълум қилди.

Байденнинг штаби ҳокимиятни топшириш бўйича расмий жараён бошланганини тасдиқлади. «Бу якуний қарор аниқлаштирувчи маъмурий хатти-ҳаракат бўлиб, федерал идораларда ҳокимиятни топшириш жараёнини расман бошлаб беради», — деди демократ штабининг ижрочи директори Йоханнес Абрахам. Унинг сўзларига кўра, ҳокимиятнинг Байденга топширилиши COVID-19 коронавируси пандемиясини ва АҚШ миллий хавфсизлигини муҳокама қилишдан бошланади. «Биз шунингдек, Трамп маъмуриятининг давлат муассасаларини қуритишга уринишлари ҳақида тўлиқ маълумот олмоқчимиз», — дея қўшиб қўйди у нимани назарда тутаётганига аниқлик киритмасдан.

Аввалроқ АҚШ Республикачилар партиясидан сенатор (Аляска штатидан) Лизи Мурковски мамлакат президенти Дональд Трампни президент сайловлари якунлари бўйича, демократлардан номзод Жо Байденга ҳокимиятни топшириш жараёнини бошлашга чақирган эди.

Шунингдек, Жо Байден Давлат департаменти раҳбарлик лавозимига ўзининг маслаҳатчиси Энтони Блинкенни тайинламоқчи эканлиги маълум бўлди.

Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.