Германия ҳукумати компаниялар раҳбариятида камида бир нафар аёл бўлишини талаб қилди

Германия ҳукумати таркибига кирувчи партиялар немис компанияларининг бошқарув раёсатида аёллар учун мажбурий квоталар жорий қилишга келишиб олди. Бу ҳақда Financial Times нашрига таяниб «РБК» хабар берди.

Канцлер Ангела Меркель бошчилигидаги Христиан-демократик иттифоқ / Христиан социал иттифоқи ҳукумрон партиялар уч ва ундан ортиқ кишидан иборат компания раҳбарияти таркибида камида бир нафар аёл бўлиши кераклиги тўғрисида состиал-демократлар билан келишувга эришди. Нашрнинг ёзишича, ушбу ташаббус «гендер тенгликка қўйилган катта қадам» сифатида қабул қилинган.

Ташаббусда, шунингдек, акциялар назорат пакети ҳукуматга тегишли бўлган компаниялар кузатув кенгашининг камида 30 фоиз ўрни аёлларга тегишли бўлишини назарда тутилган. Соғлиқни сақлаш, пенсия ва суғурта соҳаларидаги давлат идораларида ҳам аёлларга квоталар ажратиши белгиланган. Адлия вазирлиги маълумотига кўра, қарор яқин ойларда Германия Вазирлар маҳкамаси томонидан қабул қилинади.

Германиянинг Оила, кекса фуқаролар, аёллар ва ёшлар бўйича вазири Франциска Гиффай бу қарорни тарихий ютуқ деб атади. «Йирик компанияларни аёлларсиз бошқарувига чек қўямиз», деган у. Гиффайнинг таъкидлашича, 2015 йилда директорлар кенгашидаги аёллар учун белгиланган ихтиёрий квота натижа бермаган.

Financial Times’нинг ёзишича, ҳукумат қарори йирик немис бизнесини ташвишга солди. Компания вакилларининг фикрича, кенгашда аёллар учун мажбурий квотани белгилаш ташкилотнинг ички ишларига аралашиш ҳисобланади. Бундан ташқари, раҳбарлик лавозимларига мос келадиган аёл мутахассислар кам.

AllBright швед-немис жамғармаси маълумотларига кўра Германиядаги компания бошқарувидаги аёллар улуши 12,8 фоизни ташкил этади, бу бошқа мамлакатларга қараганда паст. Масалан, АҚШда раҳбарлик лавозимининг 28,6 фоизини, Буюк Британияда  24,5 фоизини, Швесияда  24,9 фоизини аёллар эгаллаган.

2019 йилда Science Science журнали инвесторларнинг раҳбариятда аёлларнинг бўлиши даромаднинг пасайишига олиб келиши мумкин, деган хулосасини эълон қилган.

Тадқиқотчилар 1889 та компания ва уларнинг 14 йиллик рентабеллиги тўғрисидаги маълумотларни таҳлил қилган. Маълум бўлишича, директорлар кенгашида аёл киши пайдо бўлганида компаниялар акциялари нархи кўп ҳолларда тушган, пасайиш ўртача икки йил давом этган. Директорлар кенгашида ҳар бир янги аёлнинг пайдо бўлиши билан компаниялар бозор қиймати 2,3 фоизга пасайган.

Қайд этилишича, компания раҳбарияти гендер тенгликни қўллаб-қувватласа ҳам, бошқарувга аёл киши келиши билан кўп ҳолларда акциядорлар ўз улушларини сотишга шошилади.