23 ноябрдан бошлаб дунё миқёсидаги пандемия ҳамда мамлакат ҳудудида ўткир юқумли касалликларнинг тарқалиши ва юқишини олдини олиш мақсадида Туркманистонда 50 ёшдан катта фуқароларнинг ҳудудлар бўйлаб ҳаракатланиши тақиқлаб қўйилди. Бу ҳақда «Хроника Туркменистана» хабар қилган.
Қайд этилишича, янги қоида аввалги чеклов чораларининг ижобий натижаси сабаб жорий этилган.
Туркманистонда 1 ноябрдан бошлаб даволаниш ёки хизмат сафари учун ёки бошқа узрли сабаб билан ҳудудлараро ҳаракатланишга рухсат этилиши белгиланганди.
Энди 50 ёшдан катта кишилар вилоятдан вилоятга умуман ўта олмайди.
Сўнгги ҳафталарда Туркманистонда қўшимча чекловлар қўлланилган, масалан, фуқароларнинг ҳаракатланиши, бозорлар фаолияти, халқаро авиақатновларнинг тўхтатилиши келаси йилгача узайтирилган, полиция томонидан фуқароларнинг доимий равишда тиббий ниқобларда юриши бўйича назорат кучайтирилган. Мазкур чораларнинг қўлланилгани мамлакатда эпидемиологик вазият ёмонлашганидан дарак бермоқда, бироқ ҳукумат ҳанузгача коронавируснинг Туркманистонга кириб келганини расман тан олмай келмоқда.
«Хроника Туркменистана»нинг ёзишича, 13 ноябрдаги ёпиқ мажлисда Соғлиқни сақлаш ва тиббий саноат вазирлиги амалдорлари вазият оғирлашганини тан олиб, юқумли касалликлар билан ишловчи муассасалар раҳбарларига биноларни таъмирлаш ва касалхоналардаги койкаларни алмаштириш юзасидан топшириқ берган.
Мавзуга доир:
Изоҳ (0)