Сербияда COVID-19 туфайли карантин кучайтирилди

Сербия ҳукумати коронавирус тарқалиши муносабати билан 24 ноябрдан янги чекловларни жорий қилди, деб ёзади «РБК» мамлакат ҳукумати сайтига таяниб.

Хусусан, ресторанлар, кафелар, барлар, тунги клублар, букмекерлик конторалари ва савдо марказлари фаолияти чекланади — улар 18:00 да ёпилиши керак. Шунингдек, беш кишидан кўпроқ бўлиб бир жойга тўпланиш ҳам тақиқланган. Дўконларда ва савдо марказларида ҳар бир киши учун 4 метр квадрат майдон тўғри келиши керак. Ишчиларнинг кўпчилиги масофадан ишлашга ўтказилиши керак.

Жамоат жойларида ва транспортда ниқоб тақиш мажбурий. Шаҳар транспорти ярмигача тўлиши керак.

Чеклов чоралари 10 кунга жорий қилинмоқда. Агар эпидемиологик вазият яхшиланмаса, бу чоралар узайтирилиши мумкин.

Сербия Соғлиқни сақлаш вазирлиги маълумотларига кўра, мамлакатда эпидемия бошидан буён 126 187 киши коронавирусга чалинган. Вафот этганларнинг умумий сони 1237 кишини ташкил этади.

Бир неча ўнлаб мамлакатлар COVID-19 тарқалиши туфайли янги чекловлар жорий қилишга улгурди, улар орасида Европа мамлакатлари ҳам бор. Чехия, Бельгия, Италия каби мамлакатларда комендантлик соати амал қилмоқда. Баъзи мамлакатлар, шу жумладан, Греция, Австрия, Франция ва Буюк Британия ўзини ўзи яккалаш режимига қайтишга қарор қилди.

Аввалроқ Жаҳон соғлиқни сақлаш ташкилотининг COVID-19 бўйича махсус элчиси Дэвид Набарро мамлакатлар инфекцияга қарши кураш учун зарур инфратузилмани яратмаса, Европада коронавирус тарқалишининг учинчи тўлқини кўтарилиши мумкинлиги ҳақида огоҳлантирган эди.