Нидерландиялик журналист Евроиттифоқ мудофаа вазирларининг ёпиқ видеоанжуманига кириб қолди. Ҳаммаси Twitter’даги постдан бошланган

Нидерландиянинг RTL Nieuws теледастури журналисти Даниэль Верлаан Евроиттифоқ мамлакатларининг мудофаа вазирларининг ёпиқ тарзда ўтаётган видеоконферецияси иштирокчисига айланди. Бу ҳақда Meduza хабар берган.

Верлаан хакерларга ўхшаб атайин видеоконференцияга киришга уринмаган. Шунчаки Twitter’да Нидерландия мудофаа вазири Анки Бэйлэвелд томонидан эълон қилган фотосуратдаги олтита рақамни, яъни конференцияда иштирок этиш кодини теришга улгурган. Фото ижтимоий тармоқдан жуда тез ўчириб ташланган, аммо RTL Nieuws теледастури ушбу код ҳақида ахборот олишга улгурган. Журналист рақамларни танлаш йўли билан етишмаган белгини аниқлаган ва ортиқча қийинчиликларсиз видеоконференцияга қўшилишни уддалаган.

Верлаан экранда кўрингач, Евроиттифоқнинг ташқи сиёсат ва хавфсизлик масалалари бўйича олий вакили Жозеп Боррел унга савол билан мурожаат қилиб, махфий конференция иштирокчисига айланганини билиш ёки билмаслиги ҳақида сўраган. Верлаан нидерландиялик журналист эканини айтиб, зудлик билан ушбу онлайн анжумандан чиқиб кетишини билдирган. Гарчи журналист ваъдасида туриб, зудлик билан видеоконференциядан чиқиб кетган бўлса ҳам, тадбир ушбу воқеадан кейин жуда тез, белгиланган муддатдан аввал якунига етган.

https://twitter.com/i/status/1329885925862760450

Европа иттифоқининг ташқи сиёсий масалалар бўйича комиссарияти содир бўлган воқеага муносабат билдириб, ёпиқ видеоконференцияда бундай пайдо бўлиш ноқонуний экани ва бу ҳақда ваколатли органларга ахборот берилишини маълум қилган. Шунингдек, комиссарият баёнотида журналист видеоанжуманга кириб қолган вақтида вазирлар ҳеч қандай махфий мавзуни муҳокама қилмагани қайд этилган.

Нидерландия бош вазири Марк Рютте мудофаа вазирларининг йиғилишларида «ҳеч кимни ҳафа қилмайдиган» мазмундаги масалалар муҳокама қилинмаслигини айтиб ўтган.

«Бошқа вазирлар ҳам Бэйлэвелд хатоси мисолида бу каби масалаларда эҳтиёткор бўлиш зарурлигини тушуниб етади деган умиддаман», — деган у.

Нидерландия мудофаа вазири эса конференцияга кириш коди акс этган сурат вазирлик ходимларидан бирининг «аҳмоқона хато»си эканини таъкидлаган.