Америкалик олимлар тунда осмонни ифлослантирувчи сунъий ёруғлик манбаларини аниқлади, деб ёзмоқда BBC News. Тадқиқот соат 01:30 да 10 кун давомида ўтказилган бўлиб, тунги осмонни заҳарловчи асосий ёруғик манбалари аниқланган.
Виржиния университети астрономи, профессор Келси Жонсоннинг таъкидлашича, ҳеч кимга фойда келтирмайдиган ёруғликка улкан ресурслар сарфланмоқда.
Сунъий ёруғликнинг инсон уйқуси ва соғлиғига салбий таъсир қилиши исботланган.
«Кеч оқшом, ҳамма ухлаган вақт — анча энергия тежаш мумкин бўлган вақтдир», — деган Германиядаги геология илмий маркази доктори Кристофер Киба.
Унинг Lighting Research & Technology журналида чоп этилган тадқиқот натижаларидан кўринишича, сунъий ёруғликнинг асосий қисми тунги кўча чироқларидан эмас, балки реклама, светофор, бинолар, автотураргоҳ ва спорт майдонларини ёритишдан чиқади.
Халқаро Dark Sky ассоциацияси тахминига кўра, сунъий ёруғликни нотўғри йўналтириш сабаб унинг 35 фоизи исроф бўлади. Маълумот учун, АҚШда ҳар йил тунда кўча ва биноларни ёритиш учун 3 миллиард доллар сарфланади.
Шаҳар чироқлари аксарият одамларнинг ҳеч қачон табиий қоронғу тунги осмонни кўрмаслигига сабаб бўлади. 2016 йилги тадқиқотга кўра, дунё аҳолисининг 80 фоизи тунги осмоннинг табиий ҳолатини кўролмайди.
Изоҳ (0)